Волонтерхэр гукIэгъуныгъэм изехьакIох
«Единэ Россием» иятIонэрэ Социальнэ онлайн-форум къэралыгъом ичIыпIэ зэфэшъхьафхэм ащыIэ волонтерхэр яIофшIэн щытегущыIагъэх.
— Волонтер гупчэхэм лъэныкъо зэфэшъхьафхэмкIэ яIофшIэн зэхащэ. А пстэуми осэ ин яI. Сыда пIомэ, шIушIэным фэхьазыр ныбжьыкIэхэр цIыфхэм IэпыIэгъу афэхъух. ГумэкIыгъоу, гъэхъагъэу яIэхэмкIэ зэдэгуащэх, — къыIуагъ партием и Генеральнэ совет хэтэу Людмила Кузнецовам. — «Единэ Россием» ятIонэрэ Социальнэ онлайн-форумэу иIагъэм къэбарыбэ къыщаIотагъ. Гурыт еджапIэм сызэрипащэм къыхэкIэу, сиIофшIэнкIэ сшIогъэшIэгъонэу щызэхэсхыгъэр макIэп.
Ащ къызэрэхигъэщыгъэмкIэ, Мыекъуапэ дэт гурыт еджапIэу N 10-м илъэситIукIэ узэкIэIэбэжьмэ кIэлэцIыкIу волонтер движениеу «Горячие сердца» зыфиIорэр щызэхащагъ. ЕджэпIэ проектэу «Память о героях в сердцах сохраним» зыфиIорэр зэнэкъокъум къыщыхагъэщыгъ. Ащ пшъэрылъ шъхьаIэу иIагъэр кIэлэцIыкIухэмрэ ахэм янэ-ятэхэмрэ дзэ-патриотическэ IофшIэным хэщэгъэнхэр, къэралыгъом рыгушхохэу пIугъэнхэр, нэмыкIхэри.
— КIэлэеджакIохэр Адыгеим щыпсэурэ ветеранхэм ыкIи заом сэкъатныгъэ хэзыхыгъэ тинахьыжъхэм чанэу IэпыIэгъу афэхъух. Волонтер движением зэрэхэтхэм рэгушхох, — къыIуагъ Людмила Кузнецовам.
Абрэдж Сэтэнай.