ЯмэфэкI мафи замыгъэпсэфэу, унэм къи­кIы мыхъущт цIыфхэм медикхэр IэпыIэгъу афэхъух.

Росстатым къызэритырэмкIэ, блэкIыгъэ илъэсым иIоныгъо мазэ ехъулIэу Урысыем щыпсэурэ нэбгырэ миллиони 2,7-м фэдиз волонтер движением хэлажьэх. Студентхэу, шIушIэныр щыIэныгъэм щыщ хъугъэу зылъытэхэрэр IэпыIэгъу щыкIэхэрэм яшIуагъэ арагъэ­кIыным фэхьазырых. «Апэрэ лъэбэкъухэр бэмэ еджапIэхэм ащашIых. Ар обществэмкIи, къэралыгъом инеущрэ мафэкIи дэгъу», — къыIуагъ «Единэ Россием» и Генеральнэ совет исекретарэу Андрей Турчак.

«Единэ Россием» иволонтер гупчэхэр къэралыгъом ишъо­лъырхэм зэкIэми ащыIэх. Ахэм яшIуагъэкIэ университет зэфэшъхьафхэм ащеджэрэ студент мини 10-м ехъу зэрапхынхэ алъэкIыгъ. Ахэр зэкIэ зэфэ­шъхьафых, ау непэ зэкъотых. Зэгъусэхэу IэпыIэгъу афэхъунхэу макIох, загъорэ ежьхэми яшIуагъэ зэрагъэкIыжьы. Джау­щтэу Ставрополь щыщ Алексей Зиминымрэ Анна Ляшенкэмрэ волонтер гупчэм нэIуасэ щызэфэхъугъэх ыкIи блэкIыгъэ илъэсым унагъо зэдашIагъ.

— 2018-рэ илъэсым Iофтхьабзэу «Урысыем истудентхэм ягъатх» зыфиIорэр тишъолъыр щырагъэкIокIы зэхъум волонтерэу тыщыIагъ. Ащ нэIуасэ тыщызэфэхъугъ. Ау пандемием илъэхъан нахь благъэу тызэ­рэшIагъ. Тыволонтерыгъ, Ставрополь имуниципалитетхэм зэ­кIэм IофшIэнхэр зэрифэ­шъуашэу ащырекIокIынхэм тыпылъыгъ. Ащ тэ тырэгушхо. Апэрэ нэплъэгъум къыщегъэ­жьагъэу синасып сызэрэIукIагъэр къызгурыIуагъ, — къеIуатэ Анна Зиминам.

Непэ пшъашъэм волонтер гупчэм иIофшIэн изэхэщэн пэщэныгъэ дызэрехьэ ыкIи Ставрополь къэралыгъо кIэлэегъэджэ институтым заочнэу ще-джэ. Алексей — аспирант. Мыщ фэдэ къэбархэм шъолъыр пэпчъ уащыIукIэн плъэкIыщт.

Студентыбэмэ ежьхэм ящы­сэкIэ ныбжьыкIэхэр волонтер движением къыхащэх. ГущыIэм пае, Ашот Маргарян Подмос­ковьем щыщ. Ар аспирантурэм ще­джэ ыкIи псэупIэу Малаховкэм дэт гурыт еджапIэу № 48-м хьисапыр ащырегъэхьы. Ащ дакIоу «Единэ Россием» иволонтер гупчэ Iоф щешIэ. КIэлэеджэкIуи 10 ищысэ рыкIуа­гъэх.

— Социальнэ хъытыумкIэ си­IофшIэн лъыплъэщтыгъэх, ежьхэри цIыфхэм IэпыIэгъу афэ­хъунхэм зэрэфэхьазырхэр къаIощтыгъэ. Волонтерэу сызыщытым къыщегъэжьагъэу цIыф гъэшIэгъонэу нэIуасэ сызфэ­хъугъэхэм афэгъэхьыгъэ къэбархэр къафэсIуатэщтыгъэ. Нэужым кIэлэеджэкIо заулэ волонтер гупчэм къыхэхьагъэх ыкIи джы тызэгъусэу IэпыIэгъу тафэхъу.

Студент-волонтерхэм къы­зэраIуатэрэмкIэ, IэпыIэгъу зы­фэ­­хъухэрэ цIыфхэм бэ ахалъа­гъорэр. Дагъыстан къэралыгъо аграрнэ университетым щеджэрэ Ахмед Абдурахмановым пандемием илъэхъан гъомылапхъэхэр зищыкIагъэхэм афи­щэщтыгъ. НахьыбэрэмкIэ, ащ фэдэ унагъохэм афэгъэхьыгъэу гъунэгъухэм къэбар къагъэIущтыгъ.

— Ащ фэдэ унагъо сыкIуагъэу слъэгъугъэр: ны-тыхэм мэ­зищы хъугъэу Iоф ашIэрэп, ахъщэ гъэтIылъыгъэ яIэп, ау IэпыIэгъу къыкIэлъэIухэрэп. Къа­Iотагъэм ыуж къызгурыIуагъ сыд фэдизэу IэпыIэгъум щы­мыкIэхэу аIоми, сишIуагъэ язгъэкIын зэрэфаер. Джырэ ма­фэм нэс унагъор синэплъэгъу изгъэкIырэп, — къыIуагъ волонтерым.

Казанскэ федеральнэ университетым имедицинэ фа­культет истудентэу Хуссеин Аммар Ирак щыщ. Урысыем зэрэфэразэр волонтерствэмкIэ къегъэлъагъо.

— 2017-рэ илъэсым къыщегъэжьагъэу волонтер-медикхэм сахэт. Пандемием икъежьэгъум IофшIэныбэ щыIагъ. Семыгу­пшысэуи врачхэм сагохьагъ ыкIи «зонэ плъыжьым» сыщыIэу сылэжьагъ. Къыхэсэгъэщы, ар псынкIагъэп, анахьэу къыо­хьы­лъэкIырэр сымаджэ узэрэхъун плъэкIыщтыр зэрэзэхапшIэрэр ары. Джащ фэдэу Iэзэгъу уцхэр афэзыхьырэ волонтерхэми сахэтыгъ. Урысыем бэ къыситыгъэр — ныбджэгъухэр, шIэны­гъэм, культурэм, бзэм сарэгу­шхо. Пандемием илъэхъан Iэ­пы­Iэгъу сызэрафэхъугъэмкIэ къэ­ралыгъом сызэрэфэразэр къис­IотыкIыгъ, — къыIотагъ Хуссеин.

Воронеж къэралыгъо медицинэ университетым иIэзэн фа­культет истудентэу Алексей Толбин «IэпыIэгъу псынкIэм» Iоф щешIэ.

— ЦIыфхэм сишIуагъэ зэрязгъэкIын амал медицинэм къысеты. Зэпахырэ узыр Урысыем къызэсым, IофшIэныр згъэтIы­лъыжьынэу зэкIэмэ къысаIо­щтыгъ. Ау сэ къызгурыIощтыгъэ джырэ уахътэ опытэу сIэ­кIэлъым хэзгъэхъон зэрэфаер, нэужым а шIэныгъэ пстэури къы­зэрэсшъхьэпэжьыщтыр. Джырэ уахътэ сыд фэдэ Iэпы­Iэгъуми осэшхо иI. Непэрэ мафэм ехъулIэу теджэ ыкIи амалэу тиIэмкIэ цIыфхэм ти­шIуагъэ ятэгъэкIы, — къеIуатэ волонтерым.

Студентхэм волонтер дви­же­нием яIахьышIу зэрэхалъхьэ-рэм фэшI «Единэ Россиемрэ» шъолъыр хэбзэ къулыкъухэмрэ зэгъусэхэу шIушIэныр шэны зыфэхъугъэхэм IэпыIэгъу афэ­хъух.

Ленинградскэ, Новгородскэ хэкухэм, Красноярскэ краим яапшъэрэ еджапIэхэм ыкIи колледжхэм ачIэсхэм ыпкIэ хэмылъэу общественнэ транспортымкIэ зекIонхэ алъэкIыщт. Медицинэ университетхэм ястудентхэу сымэджэщхэм Iоф ащызышIэхэрэм производст­веннэ практикэ акIугъэу афа­тхы. НэмыкI шъолъырхэм, гущыIэм пае Нижегородскэ хэкум, магистратурэм чIэхьанхэмкIэ волонтерхэм балл тедзэхэр афыхагъахъох. Мы чIыпIэ дэдэм «Доброрубль» зыфиIорэ программэм Iоф щешIэ. Ащ ишIуа­гъэкIэ студентхэр «волонтер сомэхэмкIэ» экскурсие кIонхэ е спортзалхэм ачIэхьанхэ амал яI. Къырым иуниверситетхэм ямылъкукIэ шIушIэным пылъ ныбжьыкIэхэр экскурсие макIох. Ульяновскэ хэкум щыIэ студент-волонтерхэр ыпкIэ хэмы­лъэу тхьамафэм къыкIоцI санаторием защарагъэгъэпсэфы.

— Тиреспубликэ истудентхэм къаIотэрэ къэбар гъэшIэгъоныбэ зэхэтэхы, — къыIуагъ Урысые акциеу «#МыВместе» зыфиIорэм и Адыгэ шъолъыр штаб ипащэу Ованес Шекерьянц. — Штабым хэт студентхэр ары нахьыбэу зыныбжь хэкIота­гъэхэм IэпыIэгъу афэхъухэрэр. Унэм къимыкIырэмэ гъомы­лапхъэхэр, Iэзэгъу уцхэр афа­хьых.

Адыгеим ит гъэсэныгъэм иорганизациехэм ащеджэрэ студентхэр зэкIэ непэ волонтер движение зэфэшъхьафхэм ахэтых. Волонтер-медикхэр рес­публикэм ит сымэджэщхэм ащыIэхэу врачхэм IэпыIэгъу афэхъух ыкIи ежьхэм яшIэ­ныгъэхэм ахагъахъо. Студент 250-м ехъур, медицинэм ха­хьэхэрэп нахь мышIэми, шIушIэ Iофтхьабзэхэм ахэлажьэх, Хэгъэгу зэошхом иветеранхэм IэпыIэгъу афэхъух, гъунэгъухэм яшIуагъэ арагъэкIы.

Абрэдж Сэтэнай.