IофшIэнхэр зэрэлъыкIуатэхэрэр зэригъэлъэгъугъ
Адыгеим и ЛIышъхьэу КъумпIыл Мурат Мыекъопэ районымрэ республикэм икъэлэ шъхьаIэрэ япсэупIэхэм якIолIэщт псырыкIуапIэмрэ псыугъоипIэмрэ яшIын зэрэлъыкIуатэрэм тыгъуасэ зыщигъэгъозагъ.
Республикэм ипащэ игъусагъэх федеральнэ инспектор шъхьаIэу Сергей Дрокиныр, ведомствэ зэфэшъхьафхэм ялIыкIохэр.
Шъугу къэдгъэкIыжьын, Адыгеир къызэлъызыубытырэ псырыкIуапIэу непэ щыIэр 1982-рэ илъэсым агъэпсыгъ ыкIи ащ ренэу гъэцэкIэжьынхэр ищыкIэгъагъэх. Федеральнэ гупчэм иIэпыIэгъукIэ 2008-рэ илъэсым щыублагъэу 2013-м нэс зашъохэрэ псым зэпыугъо фэмыхъоу аIэкIэгъэхьэгъэным фэшI псырыкIопIэ тедзэ гъэпсыгъэныр республикэм ипащэхэм игъоу алъэгъугъ. 2018-рэ илъэсым IофшIэнхэр лъагъэкIотагъэх ыкIи псэолъакIэм ишIын хэхьэрэ гъогу шъхьаIэм ишIын аухыгъ, ащ икIыхьагъэ километрэ 64-рэ мэхъу. Ар поселкэхэу Тульскэм ыкIи Табачнэм, джащ фэдэу станицэу Къурджыпс аращэлIагъэх.
Непэрэ мафэм ехъулIэу псэолъэшIхэм псыхъоу Цыцэ, псыхъожъыеу Водопадистэм псыугъоипIакIэхэр ащашIых, объект шъхьаIэм псырыкIуапIэхэр рагъэкIух. IофшIэнхэр къушъхьэ чIыпIэхэм ащэкIох, ом изытет зызэрэзэблихъурэм къыхэкIэу къиныгъохэми яуалIэх.
— Мы инфраструктурнэ псэолъакIэм ишIын республикэмкIэ мэхьанэшхо иI. УФ-м и Президентэу Владимир Путиныр ыкIи къэралыгъом и Правительствэ яIэпыIэгъукIэ мы проектым иухыжьын тыкъекIуалIэ. Ащ ишIуагъэкIэ зэпыугъо фэмыхъоу псыр аIэкIэгъэхьэгъэнымкIэ гумэкIыгъоу щыIагъэр дэгъэзыжьыгъэ хъущт. ГухэкI нахь мышIэми, гъэмэфэ фабэм ыпкъ къикIыкIэ бжыхьэ-кIымэфэ лъэхъаным псыр макIэ хъугъэ. Псэуалъэм иаужырэ километрэхэр къин дэдэу ухыжьыгъэхэ мэхъух, непэ мы чIыпIэм сыщыIагъ ыкIи цIыфхэмкIэ мэхьанэшхо зиIэ объектыр игъом тыгъэн зэрэфаер подрядчикым гурызгъэIуагъ. Охътэ гъэнэфагъэм тетэу псыр аIэкIэгъэхьэгъэным цIыфхэм гумэкIыгъуабэ къа зэрафихьырэм дэгъоу тыщыгъуаз, — къыIуагъ КъумпIыл Мурат.
Проектыр щыIэныгъэм щыпхырыщыгъэнымкIэ ишIогъэшхо къыгъэкIуагъ УФ-м и Къэралыгъо Думэ идепутатэу Владислав Резник.
Специалистхэм зэралъытэрэмкIэ, проектыр гъэцэкIагъэ зыхъукIэ чэщ-зымафэм аугъоирэ псыр гурытымкIэ кубометрэ мин 30-кIэ нахьыбэ хъущт ыкIи кубометрэ мини 140-м нэсыщт. ПсырыкIуапIэм икIыхьагъэ зэкIэмкIи километри 125-м кIэхьащт.
АР-м и ЛIышъхьэ псэолъэшI площадкэхэм защэIэм профильнэ ведомствэм ыкIи подряднэ организацием япащэхэм пшъэрылъ гъэнэфагъэхэр афишIыгъэх, 2021-рэ илъэсым гъэтхапэм ыкIэм нэс объектыр атын фаеу къариIуагъ.
АР-м и ЛIышъхьэ ипресс-къулыкъу.