Мы тхьамафэм АР-м и Къэралыгъо Совет — Хасэм и Тхьаматэ ыкIи политическэ партиеу «Единэ Россием» ифракцие ипащэ ягуадзэу Шъэо Аскэр Адыгэ республикэ кIэлэцIыкIу сымэджэщым иврач шъхьаIэу Гъо­гъо Жаннэрэ Мыекъопэ район сымэджэщым иврач шъхьаIэу, Парламентым идепутатэу Алла Чернышовамрэ аIукIэгъагъ.

«Единэ Россием» и Тхьаматэу Д. А. Медведевым ишъолъыр общественнэ приемнэ ар щыкIуагъ, Iоф­тхьабзэу «Помоги врачам» зыфиIорэм къыдыхэлъы­тэгъагъ.

Шъэо Аскэр кIэлэцIыкIоу джыри илъэсищым зыныбжь нэмысыгъэхэм апае кислородэу лъым IэкIахьэрэр зэрауплъэкIурэ пкъыгъоу, пульсоксиметрэу, афащэфыгъэхэр аритыжьыгъэх. Ащ къызэриIуагъэмкIэ, мы приборхэмкIэ щыкIагъэ зэряIэм АР-м и Парламент и Тхьаматэу Владимир Нарожнэр ежь врач шъхьаIэхэм къыщагъэгъозэгъагъ.

— Зэпахырэ узэу дунаир зэлъызыкIугъэм медицинэм иIофышIэхэм мымакIэу Iофыгъохэр къызэрафихьыгъэхэр къагурыIозэ, «единороссхэр», республикэм ипащэ апэ итэу, шъуиIофшIэн нахь гъэпсынкIэгъэным, IэпыIэгъур игъом къышъуIэкIэхьаным ыуж итых, — къыIуагъ Шъэо Аскэр. — Пульсоксиметрэхэм апае Владимир Нарожнэм зыкъызыфэшъогъазэм а лъэIур охътэ кIэкIым дгъэцэкIагъэ. Сыда пIомэ, цIыфэу къэ­сымэджагъэмкIэ, анахьэу сабый цIыкIухэмкIэ, зы такъикъыми мэхьанэ иI.

ИкIыгъэ 2020-рэ илъэсым икIэухым ащ фэдэу приборишъэ, сомэ мин 380-рэ ахэм атефагъ, медицинэм иучреждениехэм зэраратыгъэри Парламентым и Тхьаматэ игуадзэ къыхигъэщыгъ.

Сымэджэщхэм яврач шъхьаIэхэр зипэщэхэ учреждениехэм яIофхэм язытет къытегущыIагъэх. Тхьабыл уз къеолIагъэу е жьыкъэщэныр къин къыфэхъоу къаращалIэхэрэм яIофхэм язытет псынкIэу къэзгъэнэфэщт оборудованиеу ящыкIэгъэ пстэур яIэмэ медицинэ IэпыIэгъур игъом ыкIи икъоу арагъэгъотынымкIэ ишIо­гъэшхо къызэрэкIощтыр къыхагъэщыгъ.

Гъогъо Жаннэ къызэриIуагъэмкIэ, пульсоксиметрэхэр коронавирусыр къызэолIэгъэ кIэлэцIыкIухэм ямыза­къоу, нэмыкI уз зиIэхэмкIи агъэфедэх. Арышъ, лъэхъаным ишапхъэхэм адиштэу шIыгъэ пкъыгъоу къафащэфыгъэ­хэр лъэшэу къадеIэщтых, охътабэри афэхъущтых.

Алла Чернышовам зэпахырэ узым зиушъомбгъунэу зыригъэжьагъэм къыщыублагъэу IэпыIэгъум зэрэщамыгъэкIагъэхэм, язакъоу зыпарэкIи къызэрамыгъэнагъэхэм осэ ин зэрэфашIырэм къыкIигъэтхъыгъ, вирусыр зэкIэкIожьынышъ, нахьыпэрэ режимым техьажьынхэм медицинэм иIофышIэхэр зэкIэри зэрэщыгугъыхэрэр къыIуагъ.