АР-м и Къэралыгъо Совет – Хасэм и Тхьаматэ ыкIи политическэ партиеу «Единэ Россием» ифракцие ипащэ ягуадзэу Шъэо Аскэррэ бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб экономикэ зэпхыныгъэхэмкIэ Комитетым хэтэу, мы фракцие дэдэм щыщэу Джанхъот Аслъанрэ Тэхъутэмыкъое районым ит поселкэу Инэм иадминистрацие ипащэу Хъоткъо Хъызыр джырэблагъэ IукIагъэх.

Ащ хэлэжьагъ поселкэм дэт госпиталым иврач шъхьаIэу Рашид Цахаеври.

ЫпэрапшIэу поселкэм иIофхэм атегущыIагъэх, икIыгъэ илъэсыр кIэкIэу зэфахьысыжьыгъ, псэупIэм игъогухэм ягъэцэкIэжьын, яшIын, урамхэм, общественнэ чIыпIэхэм язэтегъэпсыхьан, нэмыкIыбэхэм ягугъу ашIыгъ, мы илъэсымкIэ анахьэу анаIэ зытетыщтхэр къыхагъэщыгъэх.

Непэ щыIэ Iофыгъо шъхьаIэхэм ащыщэу коронавирусым зызэриушъомбгъурэми, ащ пэшIуекIорэ Iоф­тхьабзэу зэшIуахыхэрэми атегущыIагъэх. Ащ лъыпыдзагъэу депутатхэм госпиталым Iоф щызышIэхэрэм апае халат фабэхэр къащэфыгъэхэу ащ иврач шъхьаIэ ратыжьыгъэх.

Рашид Цахаевым мы уахътэм щыгъын фабэхэр ящыкIэгъэ дэдэу зэрэщытыр къыкIигъэтхъыгъ, респуб­ликэм ипащэхэми «Единэ Россием» хэтхэми ренэу анаIэ къазаратетым, Iофыгъоу къыкъокIыхэрэм ядэгъэзыжьынкIэ IэпыIэгъушхо къызэрафэхъухэрэм фэшI «тхьашъуегъэпсэу» ариIуагъ.

Сымэджэщыр корпуситIоу зэтеутыгъ, Iоф щызышIэхэрэр ахэм азыфагу итынхэ фаеу мэхъу. Арышъ, халат фабэхэр лъэшэу къашъхьэпэщтых.

ХЪУТ Нэфсэт.