Проектыр зэрэпхыращыщтым тегущыIагъэх
Адыгеим и ЛIышъхьэу КъумпIыл Муратрэ проектэу «Производственная система «Росатом» зыфиIорэм ипащэу Дмитрий Репьевымрэ Адыгэ Республикэм и Правительствэ зычIэт унэм тыгъуасэ зэIукIэгъу щызэдыряIагъ. Проектэу «КIэугъоекIо правительств» зыфиIорэр республикэм тапэкIэ зэрэщыпхыращыщтым ахэр тегущыIагъэх.
ЗэIукIэгъур къызэIуихызэ, IофшIэным зыкъегъэIэтыгъэнымкIэ, зыпкъ итэу республикэм хэхъоныгъэ егъэшIыгъэнымкIэ, цIыфхэм ящыIэкIэ-псэукIэ нахьышIу шIыгъэнымкIэ проектым мэхьанэшхо зэриIэр Адыгеим и ЛIышъхьэ хигъэунэфыкIыгъ.
«Лъэныкъо пстэуми зэхъокIыныгъэхэр ащашIыхэзэ, республикэм нэкъокъонымкIэ амалэу иIэхэм зыкъягъэIэтыгъэным тиджырэ лъэхъан мэхьанэшхо иIэу щыт. Хэбзэ къулыкъухэм ямызакъоу, медицинэми, гъэсэныгъэ зыщарагъэгъотырэ лъэныкъоми, экономикэми, псэолъэшIыными мылъкур зэрэщыкIаугъоещт шIыкIэр проектым щыгъэнэфагъ, мы IофшIэным муниципалитетхэри къыхэтэгъэлажьэх», — къыIуагъ КъумпIыл Мурат.
Проектэу «КIэугъоекIо правительств» зыфиIорэм къыдыхэлъытагъэу Адыгэ Республикэм икъэралыгъо хабзэ игъэцэкIэкIо къулыкъухэмрэ организациехэмрэ къэралыгъом игъэIорышIэнкIэ, промышленностымкIэ, гъэсэныгъэмкIэ, ЖКХ-мкIэ, псауныгъэм икъэухъумэнкIэ проект 74-рэ агъэцакIэ. ЗэхъокIыныгъэ зыфашIыгъэ процессхэм фэди 1,6 — 4-кIэ нахьыбэу шIуагъэ къаты хъугъэ.
Урысые Федерацием ишъолъырхэм ягъэцэкIэкIо хэбзэ къулыкъухэм, чIыпIэ зыгъэIорышIэжьынымкIэ къулыкъухэм, предприятиехэм мылъкур кIэугъоегъэнымкIэ амал пэрытхэр къызфэгъэфедэгъэнхэмкIэ къэралыгъо корпорациеу «Росатомым» Iофэу ышIэрэм Дмитрий Репьевыр къытегущыIагъ. Проектым ипащэ къызэриIуагъэмкIэ, процессхэр оптимизацие зэрашIыхэрэм амал къеты цIыфхэмкIэ мэхьанэшхо зиIэ пшъэрылъхэр зэшIуахынхэу, Iофыгъоу щыIэхэр дагъэзыжьынхэу. ГущыIэм пае, къэралыгъо корпорацием испециалистхэм коронавирусыр къямыутэлIэным пае прививкэ цIыфхэр зэрашIыщт стратегиер охътэ кIэкIыкIэ къыхихыгъ. Ащ ишIуагъэкIэ цIыфхэм Iоф ашIэзэ, поликлиникэхэм ащ фэдизэу цIыфхэр атемыгъэуагъэу псынкIэу вакцинэхэр зыхарагъэлъхьан алъэкIыщт.
ЗэIукIэгъум икIэуххэм къатегущыIэзэ, Адыгэ Республикэм и ЛIышъхьэ къыхигъэщыгъ республикэмрэ къэралыгъо корпорациеу «Росатомымрэ» азыфагу зэдэлэжьэныгъэ дэгъу илъ зэрэхъугъэр. КъумпIыл Мурат ведомствэ заулэмэ япащэмэ пшъэрылъ афишIыгъ къэралыгъо корпорацием игъусэхэу мылъкум икIэугъоенкIэ амал пэрытхэр республикэм къыщызфагъэфедэнхэу.
Адыгэ Республикэм и ЛIышъхьэ ипресс-къулыкъу