Адыгэ Республикэм и ЛIышъхьэу КъумпIыл Мурат Урысыем ПенсиехэмкIэ ифонд и Къутамэу шъолъырым щыIэм игъэIорышIакIоу агъэнэфэгъэ МэщлIэкъо Хьамидэ тыгъуасэ IукIагъ. Илъэс 19 фэдизрэ пенсионнэ системэм Iоф щызышIэгъэ, ащ щыщэу илъэс 15-м пэщэ IэнатIэм Iутыгъэ Къулэ Аскэрбый ычIыпIэ ар ихьагъ.

ЗэIукIэгъум хэлэжьагъэх рес­публикэм ивице-премьерэу Наталья Широковар, АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, фондым и Къутамэ ипэщагъэу Къулэ Аскэрбый.

Адыгеим и ЛIышъхьэ илъэс пчъагъэхэм къакIоцI щытхъу хэлъэу иIофшIэн зыгъэцэкIэгъэ А. Къулэм фэрэзагъ.

— Пэщэныгъэ зыдызепхьэгъэ Къутамэм хэхъоныгъэшIухэр ышIыгъэх, УФ-м ПенсиехэмкIэ ифонд иотделхэр къалэхэм ыкIи районхэм къадэуцуагъэх, ахэр зэтырагъэпсыхьагъэх. Къэгъэ­лъэгъонэу шъуиIэхэмкIэ къэралыгъом исубъектхэм азыфагу пэрытныгъэ сыдигъуи щышъуIыгъыгъ, ведомственнэ Iофтхьабзэхэм, спорт зэнэкъокъухэм республикэр чанэу къащыжъу­гъэлъэгъуагъ, ыцIэ дахэкIэ ря­жъугъэIуагъ. Депутат IэнатIэм уIутэу а IофшIэныр непи лъыогъэкIуатэ, — къыIуагъ АР-м и ЛIышъхьэ.

ИIофшIэн осэшIу къыфэзышIыгъэ республикэм ипащэ Къулэ Аскэрбый фэрэзагъ. БлэкIыгъэ илъэс закъом пенсиехэмкIэ фондым ишъолъыр Къутамэ республикэм щыпсэухэрэм сомэ миллиард 22-м ехъу тынхэр зэраIэкIигъэ­хьагъэр хигъэунэфыкIыгъ. Джащ фэдэу УФ-м и Президентэу Владимир Путиным къыгъэнэфэгъэ социальнэ тынхэр игъом ыкIи икъоу афатIупщыгъэх.

Ведомствэм шIуагъэ къытэу иIофшIэн тапэкIи зэхищэным Къутамэм ипэщакIэ зэрэпылъыщтым ицыхьэ зэрэтелъыр республикэм ипащэ къыIуагъ.

— Пэщэ IэнатIэхэм уаIутэу Iоф пшIагъэ, ащкIэ опытышхо пIэкIэлъ, аужырэ уахътэм АР-м IофшIэнымкIэ ыкIи социальнэ хэхъоныгъэмкIэ иминистрэ игуа­дзэу улэжьагъ. Пшъэрылъэу щытхэр зэрифэшъуашэу зэшIопхынхэмкIэ а пстэуми яшIогъэшхо къэкIощт, — къы­Iуагъ Адыгеим и ЛIышъхьэ Хь. МэщлIэ­къом зыкъыфигъазэзэ.

Къутамэм хэхъоныгъэ ышIыным, цIыфхэм яфэIо-фашIэхэр зэрифэшъуашэу афэгъэцэкIэгъэным ыкIуачIи, ишIэныгъи зэрэрихьылIэщтыр МэщлIэкъо Хьамид къыхигъэ­щыгъ.

МэщлIэкъо Хьамид Теуцожь районым ит къуаджэу Нэчэрэзые 1965-рэ илъэсым бэдзэогъум и 12-м къыщыхъугъ. 1988-рэ илъэ­сым Адыгэ къэралыгъо кIэлэегъэджэ институтыр, 1995-рэ илъэсым Таганрогскэ къэралыгъо радиотехническэ университетыр къыухыгъэх. Илъэс 18-м ехъурэ хэбзэIахь къулыкъухэм ахэтыгъ, ащ щыщэу илъэс 15-м пэщэ IэнатIэхэм аIутыгъ. 2009-рэ илъэсым щыублагъэу 2019-рэ илъэсым нэс АР-м и ЛIышъхьэрэ министрэхэм я Кабинетрэ я Администрацие ипащэ игуадзэу Iоф ышIагъ. 2019-рэ илъэсым щегъэжьагъэу АР-м IофшIэнымкIэ ыкIи социальнэ хэхъоны­гъэмкIэ иминистрэ игуадзэу щытыгъ.

ЩытхъуцIэу «Адыгэ Республикэм изаслуженнэ экономист» зыфиIорэр Хь. МэщлIэкъом къыфагъэшъошагъ. АР-м и Къэралыгъо Совет – Хасэм итамы­гъэу «Закон. Долг. Честь» зыфиIорэр, джащ фэдэу Уф-м и Президент ирэзэныгъэ тхылъ къыратыгъэх. АР-м и ЛIышъхьэ ипресс-къулыкъу.