ЦIыфхэм яIофыгъохэр зэхафых
Лъэныкъо зэфэшъхьафхэм япхыгъэу закъыфэзыгъэзэрэ цIыфхэм ятхылъхэм ахэплъэгъэным епхыгъэ IофшIэныр Адыгеим и ЛIышъхьэу КъумпIыл Мурат зэпигъэурэп. ЦIыфхэм ядаохэм ыкIи яеплъыкIэхэм республикэм ипащэ ынаIэ атырегъэты. Джыри а IофшIэныр нахь лъыгъэкIотэгъэным ыкIи къэуцурэ Iофыгъохэр псынкIэу зэхэфыгъэнхэм афэшI шъолъырым игъэIорышIэнкIэ гупчэ (ЦУР) бэмышIэу къызэIуахыгъ.
Чэщи мафи зэпымыоу дэо тхылъхэр ыкIи къэбархэр къаIэкIэхьэх. Автомат шIыкIэхэу «Инцидент Менеджмент» ыкIи «Платформа обратной связи» зыфиIохэрэм яшIуагъэкIэ ахэр аугъоих. Джащ фэдэу, гъэцэкIэкIо къулыкъухэм яинтернет-приемнэхэмкIэ, мобильнэ едзыгъоу «Госуслуги Жалобы» зыфиIорэмкIэ цIыфхэм ягумэкIыгъохэр къаIэкIахьэх.
Республикэ ведомствэхэм яспециалистхэмрэ шъолъырым игъэIорышIэнкIэ гупчэм иIофышIэхэмрэ зэгъусэхэу охътэ кIэкIым къыкIоцI IофшIэн гъэнэфагъэхэр агъэцэкIагъэх. Социальнэ хъытыум къыщызэIухыгъэ официальнэ нэкIубгъохэм къарыхьэгъэ Iофыгъохэр зэшIуахыгъэх. Чэщ–зымэфэ закъом Адыгеим псауныгъэр къэухъумэгъэнымкIэ и Министерствэрэ ЦУР-мрэ цIыфхэм закъызэрэфагъэзэгъэ Iофыгъо 41-мкIэ джэуапхэр аратыжьыгъэх. Ахэм ащыщэу процент 70-м къэбар IэпыIэгъу ящыкIэгъагъ, адрэ процент 30-м — Iофыгъохэм язэшIохын. ГумэкIыгъохэм янахьыбэр вакцинацием ыкIи коронавирусым епхыгъэх.
Осышхоу къесыгъагъэм къыздихьыгъэ гумэкIыгъохэм ядэгъэзыжьын шъолъырым игъэIорышIэнкIэ гупчэм сыхьатищкIэ зэшIуихын ылъэкIыгъ. Урамхэм ателъ осыр зэрамытхъурэм епхыгъэ дао Мыекъопэ районым щыпсэурэ бзылъфыгъэм социальнэ хъытыум къыригъэхьагъ. Татьяна Булгаковам къызэриIуагъэмкIэ, поселкэу Первомайскэм игупчэ урам закъо агъэкъабзи, адрэхэр къагъэнагъэх. Iофыгъом изэшIохынкIэ гупчэм Абадзехскэ къоджэ псэупIэм иадминистрацие зыфигъэзагъ. ЕгъашIи техникэ зытемыхьэгъэ урамым осыр щатхъугъ. Iофыгъор псынкIэу зэрэзэшIуахыгъэр Татьянэ лъэшэу гуапэ щыхъугъ ыкIи гупчэмрэ администрациемрэ зэрафэразэр хигъэунэфыкIыгъ.
Адыгеим иведомствэхэмрэ шъолъырым игъэIорышIэнкIэ гупчэмрэ зэготхэу Iоф зэрэзэдашIэрэм ишIуагъэкIэ цIыфхэм ягумэкIыгъохэр псынкIэу зэшIуахых. Закъыфэзыгъэзагъэхэм джэуап агъотыжьыным текIодэрэ уахътэр бэкIэ нахь макI. Нэбгырэ пэпчъ зыгъэгумэкIырэ Iофыгъор ЦУР-м инэкIубгъоу «@tsur_01» е мобильнэ едзыгъоу «Госуслуги жалобы» зыфиIохэрэм аритхэн ылъэкIыщт. Даор ащ фэгъэзэгъэ къулыкъум занкIэу фырагъэхьы ыкIи цIыфыр емыкIуалIэу охътэ кIэкIым къыкIоцI унашъоу ашIыгъэм щагъэгъуазэ.