Лъэпкъ проектэу «Гъэсэныгъ» зыфиIорэм къыдыхэлъытэгъэ шъолъыр проектэу «Джырэ лъэхъаным диштэрэ еджапI» зыфиIорэм ишIуагъэкIэ зипсауныгъэ амалхэр зэщыкъогъэ кIэлэцIыкIухэр ыкIи сабый ибэхэр зыщаIыгъхэ еджэпIэ-интернатэу Хьакурынэхьаблэ дэтым иматериальнэ-техническэ зытет хэхъоныгъэ ышIыгъ.

Психолого-педагогическэ ыкIи дефектологие лъэныкъохэмкIэ кIэлэцIыкIухэм Iоф зыщадашIэрэ кабинетитIур агъэкIэжьыгъэх.

Егъэджэн Iофым шIуагъэ къытэу зэхэщэгъэныр гъэсэныгъэмкIэ федеральнэ къэралыгъо шапхъэм къызэрэщыдыхэлъытагъэм тетэу дефектологым икабинет нэрылъэгъу IэпыIэ­-гъу­хэмкIэ, егъэджэн оборудо­ва­ниемкIэ, мебелкIэ, техниче- скэ амалхэмкIэ зэтырагъэ­псыхьагъ. ДжэгукIэ наборэу «Дары Фребеля» зыфиIорэр кIэлэ­егъэджэ-дефектологым иIофшIэн щегъэфедэ. ИгупшысакIэ зыпкъ зэрэригъэуцорэм дакIоу, мыщ егъэджэныр джэгукIэ ыкIи пшысэ шIыкIэм атетэу зэхэпщэн амал къыуеты.

— ХэзгъэунэфыкIымэ сшIоигъу, коммуникационнэ амалхэм яшIуагъэкIэ ны-тыхэм зэпхыныгъэ зэрадытиIэр. ЗанкIэу къыткIэрыхьанхэ зэралъэкIырэм фэдэу, пэIудзыгъэ шIыкIэри тэгъэфедэ. ЗыгъэгумэкIырэ упчIэхэр ватцап ыкIи вайбер амалхэмкIэ къытфагъэзэнхэ алъэкIы, — къыIуагъ еджэпIэ- интернатым ипащэу Хъуажъ Марыет.

— Ащ фэдэ зэдэгущыIэгъу шIыкIэм ны-тыхэр, кIэлэегъа­джэхэр зэфещэх. Ны-тыхэм яшIошIхэр егъэджэным, пIуныгъэм къащыдыхэтлъытэнхэ тэлъэ­кIы, — къыхигъэщыгъ кIэ­лэегъэджэ-дефектологэу Къуанэ Замирэ.