ПенсиехэмкIэ фондым къеты
Зы мафэр тIоу къафалъытэщт
Медицинэм иIофышIэу коронавирусыкIэу COVID-19-р къызэолIагъэхэм яIазэхэрэм IофшIэгъэ илъэсэу яIэр афагъэнафэ зыхъукIэ, зы мэфэ IофшIагъэр тIоу къафалъытэщт.
УФ-м и Правительствэ иунашъоу 2020-рэ илъэсым шышъхьэIум и 6-м къыдэкIыгъэм ар щыгъэнэфагъ. Зэпахырэ узыр къызэолIагъэхэм Iоф зарадашIэгъэ пIалъэр къызэрэлъытэгъэщт шэпхъэ гъэнэфагъэхэр тхылъым итхагъэх.
Медицинэм иIофышIэу коронавирусыр къеолIагъэу зэгуцафэхэрэр зыгъэкощыхэрэр, ар къеолIагъэу сымэджэщхэм ачIэлъхэм, пэтхъу-Iутхъу хъугъэу е тхьабыл уз зиIэхэм IэпыIэгъу язытыхэрэр, анализхэр аIызыхыхэрэр ащ къыхеубытэх.
Джащ фэдэу зы IофшIэгъу мафэр тIоу къафалъытэщт коронавирусыр къеолIагъэу е пэтхъу-Iутхъу хъугъэу, ау унэм исэу зэIазэхэрэм медицинэм иIофышIэу IэпыIэгъу язытыхэрэми.
ФэгъэкIотэнэу яIэхэр
2019-рэ илъэсым ищылэ мазэ и 1-м къыщыублагъэу пенсием зыныбжь екIолIагъэхэм ахалъытэхэрэм (пред-пенсионерхэр) фэгъэкIотэнхэр яIэ хъугъэх. Ахэм ахахьэхэрэр пенсием кIонкIэ илъэситф къызыфэнагъэхэр ары.
Законым къызэрэщыдэлъытагъэмкIэ, мы купым хахьэхэрэм диспансеризациер акIуным пае ялэжьапкIэ къызэтенэу IофшIэгъу мэфитIу аштэн фитых. Ащ пае IофшIэпIэ чIыпIэр къязытыгъэм лъэIу тхылъ фатхын ыкIи мафэхэр зэдагъэнэфэнхэ фае.
ХэбзэIахьхэм ятынкIи мыхэм фэгъэкIотэнхэр яIэх. ГущыIэм пае, чIыгу Iахьэу сотки 6 нахьыбэ мыхъурэм пае хэбзэIахь атыщтэп, ау ащ къехъурэм тефэрэр къыфалъытэщт. Джащ фэдэу зы унэрэ зы фэтэрырэ иIэмэ, тIумэ яз паи хэбзэIахьыр ытыщтэп.
Субъект пэпчъ мы купым хахьэхэрэм апае фэгъэкIотэн тедзэхэр егъэнафэх. Адыгеир пштэмэ, бзылъфыгъэу илъэс 55-м, хъулъфыгъэу — 60-м зыныбжь нэсыгъэр IофшIэным иветеранэу е ащ рагъапшэхэрэм ахахьэмэ, мазэ къэс ахъщэ тын къыфэкIощт, ыпкIэ хэмылъэу цэхэр аригъэшIынхэу фитыныгъэ иI, транспортым пае хэбзэIахьэу къытефэрэм ипроцент 50-р ары ытыщтыр.
ЦIыфым пенсием ыныбжь зэрекIолIагъэр къыушыхьатыным пае лъэIу тхылъыр шIокI имыIэу ытын фаеу щытэп. НахьыбэрэмкIэ хэбзэIахьхэмкIэ къулыкъуми, республикэм ихэбзэ гъэцэкIэкIо къулыкъухэми, IофшIэпIэ чIыпIэхэр къэзытыхэрэми электроннэ шIыкIэм тетэу тхылъхэр къызIэкIагъахьэх.
ЗыгорэкIэ ПенсиехэмкIэ фондым ащ фэдэ къэбар IэкIэмылъэу къычIэкIыгъэмэ ары ежь ышъхьэкIэ екIолIэн фаеу зыхъурэр. IофшIэпIэ чIыпIэр къезытыгъэм отчетыр игъом къымытыгъэмэ ары ащ фэдэ къызыхэкIырэр. Аущтэу хъугъэмэ, цIыфыр ПенсиехэмкIэ фондым е МФЦ-м екIуалIэмэ хъущт, почтэм ифэIо-фашIэхэр е электроннэ шIыкIэр къызфигъэфедэнхи ылъэкIыщт.
IофшIэпIэ чIыпIэр къязытыгъэм ушъхьагъу гъэнэфагъэ щымыIэу къыIуигъэкIын фитэп. Ыныбжь пенсием зэрекIолIагъэм пае къыIузгъэкIырэм е IофшIапIэм зымыштэрэм пшъэдэкIыжь ыхьынэу Уголовнэ кодексым къыщыдэлъытагъ.
Пенсием ыныбжь екIолIагъэу IофшIэпIэ чIыпIэр чIинагъэмэ, пособиеу къыратыщтыр адрэхэм аратырэм нахьыбэу УФ-м ихэбзэгъэуцугъэ щыгъэнэфагъ.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу