КIуачIэхэм ахигъэхъуагъ
ЗыкI энергетическэ системэм икомпаниеу «Россети ФСК ЕЭС» зыфиIорэм поселкэу Яблоновскэм электроэнергиемкIэ кIуачIэу иIэхэм ахигъэхъуагъ.
Мы псэупIэм районыкIэу щагъэпсыщтым электричествэу ищыкIэгъэщтыр IэкIэгъэхьэгъэным пае киловатт 220-рэ къэзытырэ подстанциеу иIэм ыкIуачIэ джыри мегаваттитф хагъэхъуагъ. Гектари 100-м ехъурэ чIыпIэу агъэнэфагъэм фэтэрыбэу зэхэт унэхэр, сатыушIыпIэхэр, социальнэ псэуалъэхэр щагъэуцущтых.
Подстанцием едзыгъуитIукIэ районыр рапхыгъ. АпэрэмкIэ — электричествэр зэбгырызытIупщырэ псэуалъэу хэтым зырагъэушъомбгъугъ, зэрыкIощт гъучIычхэр пкъэухэм апашIагъэх. ЯтIонэрэмкIэ — зым мегавольт-ампер 25-рэ къытэу трансформаторитIоу яIэр 80-м нэс къэзытыщтхэмкIэ зэблахъугъэх.
Поселкэу Яблоновскэм нэбгырэ пчъагъэу дэсымкIэ Адыгеим ятIонэрэ чIыпIэр щеубыты. Киловатт 220-рэ къэзытырэ подстанциеу псэупIэм ыцIэ зыфаусыжьыгъэр Тэхъутэмыкъое районэу етIупщыгъэу зызыушъомбгъурэм электроэнергиемкIэ кIуачIэу иIэм хагъэхъонэу 2009-рэ илъэсыр ары загъэпсыгъэр.