«Россети Кубань» и Адыгэ шъолъыр къутамэ испециалистхэм электричествэм икIуапIэу километрэ минрэ 700-рэ агъэцэкIэжьынэу 2021-рэ илъэсымкIэ агъэнэ­фагъ.

Энергетикхэм гъучIыч километри 110-рэ, ахэр зыпышIэгъэ изолятор мин 14, пчыкIэр къезымыгъаорэ гъучIычхэм афэдэу километрэ 25-рэ, пкъэу 435-рэ зэблахъун гухэлъ яI, бзыухэр атетIысхьэхэмэ, ахэр ухъумэгъэнхэм ищыкIагъэхэри ахагъэуцощтых. Джащ фэдэу электричествэм икIуапIэу пышIагъэхэм ачIэгъхэр агъэкъэбзэщтых.

— Мы Iофтхьабзэхэр Адыгеимрэ Краснодар краимрэ ащыпсэурэ нэбгырэ мин 500-м ехъоу къытэпхыгъэхэм электроэнергиер зэпыу фэмыхъоу аIэкIэгъэхьэгъэным фытегъэпсыхьагъэх, — къыIуагъ Адыгэ шъолъыр къутамэм ипащэу Рустам Магдеевым.

Къутамэм Адыгеим и Мыекъопэ, Джэджэ, Шэуджэн, Кощхьэблэ ыкIи Красногвардейскэ, Краснодар краим и Шытхьэлэ ыкIи Апшеронскэ районхэм электричествэр ареты. Ахэм нэбгырэ мин 520-м ехъу ащэпсэу. Киловатт 35 — 100 кIуачIэу зиIэ подстанцие 59-рэ, трансформатор 2097-рэ епхыгъ. ЗэпстэумкIи кIуачIэу иIэр мегавольт-ампер 971-рэ, электричествэм икIуапIэхэр километрэ 8977-рэ мэхъух.