Шъолъыр проектэу «Санаторий на дому» зыфиIорэр лъэпкъ про­ектэу «Демографием» къыдыхэлъытагъэхэм ягъэцэкIэн пае АР-м IофшIэнымкIэ ыкIи социальнэ хэхъоныгъэмкIэ и Министерствэ ытIупщыгъ. Ар цIыфхэм социальнэ фэIо-фашIэхэр афэгъэцэкIэгъэнхэмкIэ Гупчэхэм блэкIыгъэ илъэсым къыщегъэжьагъэу пхыращы.

Iоф ышIэным ыныбжь шъхьарыкIыгъэу мы уахътэм Адыгеим нэбгырэ мини 114-м ехъу щэ­псэу. Ахэм ащыщэу нэбгырэ мини 5 фэдизмэ унэм исхэу социальнэ фэIо-фашIэхэр афагъэцакIэх. Нахьыжъхэм аныбжь нахь хэкIуатэ къэси ягулъытэ нахь къеIыхы, яакъылкIэ Iоф ашIэмэ, псынкIэу мэпшъых, гущыIэу къаIомэ ашIоигъор къамыгъотыжьышъоу мэхъу… Ащ апае ахэм шIыкIэ гъэнэфагъэхэмкIэ уяIэзэн фаеу щыт.

«Санаторий на дому» зыфи­Iорэм къыдыхэлъытагъэу нэжъ- Iужъэу медицинэм иучреждение кIон амал зимыIэхэм унэм исхэу врачым къафигъэнэфа­гъэм диштэрэ медицинэ IэпыIэгъур арагъэгъоты, социальнэ фэIо-фашIэхэр афагъэцакIэх. Ащ имызакъоу шIоигъоныгъэ зиIэхэм юридическэуи, психологическэуи адеIэх.

ЦIыфхэм социальнэ фэIо-фашIэхэр афэгъэцэкIэгъэнхэмкIэ Гупчэхэм яспециалистхэм нэжъ-Iужъ пэпчъ иIофхэм язытет нахьышIу зэрэхъущтым, щыIэныгъэм зэрэхэгъозэжьыщтым афытегъэпсыхьэгъэ программэр мэфипшIым телъытагъэу фызэхагъэуцо. Ащ массажхэр, упражнениехэр, жьы къабзэм зэрэхэтыщтыр, нэмыкIыбэ къыды­хэ­лъытагъэх. Ипсауныгъэ изытеткIэ ахэр зыфэмыгъэцэкIэщтхэм афызэхагъэуцорэ программэри шъхьафы. ИщыкIагъэмэ, ащ фэдэу зипсауныгъэ къыщыкIагъэхэм яунагъохэм арысхэм фэIо-фашIэхэр зэрафагъэцэкIэщтхэми фагъасэх.