Израиль ит адыгэ къуаджэу Кфар-Камэ Нат­хъо Бибарс щапIугъ. Футбол ар ешIэзэ цIэ­рыIо хъугъэ.

«Рубин» Казань, ЦСКА Москва Б. Натхъор ахэтэу щысэшIу къызэригъэлъагъощтыгъэр тщыгъупшэрэп. Ащ ешIакIохэр кIырыплъыхэзэ, дунаим щызэ­лъашIэх.

Францием икомандэу «Монако» зыфиIорэм Александр Головиныр щешIэ. Натхъо Бибарсрэ Александр Головинымрэ ЦСКА-м хэтыгъэх, яIэпэIэсэныгъэкIэ илъэ­сыбэрэ тагъэгушIуагъ.

Мэфэ заулэкIэ узэкIэIэбэжьмэ, я 21-рэ ешIэгъухэр Францием щыкIуагъэх. «Монакор» «Марселым» зыIокIэм, 3:1-у те­кIуагъ.

А. Головиныр я 46-рэ такъи­къым ешIапIэм къызехьэм, 1:0-у «Марселым» зэнэкъокъур ыхьыщтыгъ. Я 47-рэ такъикъым А. Головиным угловоир къызетым, Г. Марипан шъхьэкIэ къэлапчъэм Iэгуаор дидзагъ — 1:1. Я 75-рэ такъикъым А. Головиным угловоир къызетым, О. Тчуа­мени Iэгуаом шъхьэкIэ еуи, хъа­гъэм дидзагъ — 2:1.

Б. Натхъор ЦСКА-м щешIэзэ, фэIэпэIасэу угловоир къызэ­ритыщтыгъэ шIыкIэр А. Головиным щысэшIу фэхъугъэу тэлъытэ.

А. Головиным иешIакIэ бэмэ агу рихьыгъ, зэIукIэгъум къэгъэ­запIэ зэрэфишIыгъэр спортым хэшIыкI фызиIэхэм къыхагъэ­щыгъ.

Францием футболымкIэ изэ­нэкъокъу ПСЖ-м апэрэ чIыпIэр щиIыгъ, очко 45-рэ иI. «Монакор» я 4-рэ чIыпIэм щыI, очко 39-рэ ригъэкъугъ, «Леоным» оч­коуи 4-кIэ ыуж къенэ. А. Голо­виным икомандэ Европэм и Кубок фэгъэхьыгъэ ешIэгъухэм ахэлэжьэным фэбанэ. А. Голови­ныр Уры­сыем футболымкIэ ихэшыпыкIыгъэ командэ хэт.

Натхъо Бибарс футбол клубэу «Партизан» Белград, Израиль ихэшыпыкIыгъэ командэ ащешIэ.