Урысыем футболымкIэ изэнэ­къокъу хэлэжьэрэ коман­дэ­хэу апшъэрэ купым хэт­хэм ныбджэгъу-уплъэ­кIун зэIу­кIэ­­гъу­хэр IэкIыб хэгъэ­гухэм ащы­зэхащэх.«Локомотив» Москва Испанием икомандэу «Велесым» 4:1-у текIуагъ. «Краснодар» Польшэм икомандэу «Легием» 0:0-у дешIагъ. «Динамо» Москва Польшэм икомандэу «Ракувым» зыIокIэм, 0:2-у ешIэгъур шIуахьыгъ.

«Краснодар» зегъэхьазыры

Европэм и Кубок къыдэхыгъэным «Краснодар» хэлажьэ. Финалым и 1/16-м гъунэгъу краим икомандэ «Динамо» Загреб щыIукIэщт. «Краснодар» итренер шъхьаIэу Мурад Мусаевым къыIуагъ «Легием» зэрэдешIагъэхэм мэхьэнэ хэхыгъэ иIэу зэри­лъытэрэр.

— ЕшIакIэу «Краснодар» къыгъэлъэгъуа­гъэм сигъэрэзагъ, — хигъэунэфыкIыгъ М. Мусаевым. — «Динамэм» дытиIэщт зэIукIэгъум хэушъхьафыкIыгъэу зыфэтэгъэ­хьазыры.

Промес «Спартак»къыгъэзэжьыщта?

«Спартак» Александр Кокориныр хэ­кIыжьыгъ. Ащ ичIыпIэ рагъахьэ ашIоигъоу клубым ипащэхэр Промес дэгущыIэх. Промес «Спартак» щешIэщтыгъ. Аужырэ илъэсым Голландием икомандэу «Аяксым» хэтыгъ. Промес ешIэкIо дэгъу, къэлапчъэм Iэгуаор бэрэ дедзэ.

2020 — 2021-рэ илъэс зэнэкъокъум хэхьэрэ зэIукIэгъухэр мэзаем и 27-м ра­гъэжьэщтых.

ЗэIукIэгъухэр

Щылэ мазэм и 27-м «Локомотив» Швецием икомандэ лъэшхэм ащыщ дешIагъ. «Краснодар» Латвием, Беларусым якомандэхэм аIукIагъ. Щылэ мазэм и 28-м ЦСКА-р Испанием, «Спартак» Узбекистан, «Динамэр» Казахстан якомандэхэм аIукIэщтых.