Сэ Адыгэкъалэ сыщэпсэу. Гурыт еджапIэу N 1-м ия 6-рэ «В» класс сыщеджэ. ЛIакъомкIэ Очэпщые сыщыщ. Лъэшэу орэдкъэ­Iо­ныр сикIас, ащ гухахъо хэсэгъуатэ. ВокалымкIэ сикIэлэегъаджэу Мирзоева Джамиля Габиль Кызы мэкъэ дахэ сиIэу орэд къэсIоным сыфегъасэ.

ЫпэкIэ фэмыдэу нахь зэIу­хыгъэ ыкIи чэфы сыхъугъ, ныб­джэгъуби сиIэ хъугъэ. Музыкальнэ зэнэкъокъухэм сахэла­жьэ. Синасып къыхьи, Урысые зэнэкъокъоу «PRO 100 песня», Урысые фестиваль-зэнэкъокъоу «Волна вдохновения», искусствэхэмкIэ Дунэе фестивалэу «Российский берег», Дунэе зэнэкъокъоу «Полифония сердец» зыфиIохэрэм сахэлэжьагъ.

Мы зэнэкъокъухэм яшIуагъэ­кIэ зэфыщытыкIэ дэгъухэр тазыфагу илъ хъугъэ. Зэнэкъо­къум хэлажьэхэрэр зэфэгуIэжьых, ныбджэгъу зэфэхъух. IэпэIэсэныгъэу аIэкIэлъымкIэ зэдэгуащэх. Мыщ фэдэ зэIукIэхэм яшIуагъэкIэ шIэныгъэу тиIэхэм ахэдгъэхъон тэлъэкIы. Силэгъухэм зафэзгъазэ сшIоигъу: «Зыгорэм шъукIэхъопсэу, къыжъудэхъу шъушIоигъомэ, шъукъызэкIэмыкIу».

Джащ фэдэу сянэ-сятэхэм «тхьашъуегъэпсэу» ясэIо, ренэу къыздырагъаштэ ыкIи яцы­хьэ къыстелъ.

Кушъу Бэлл.

Редакцием ыцIэкIэ.

Мыщ фэдэ письмэ цIыкIу Адыгэкъалэ къыратхыкIи, журналэу «Родничок Адыгеи» зыфиIорэм къыфэкIуагъ. Тиныб­джэгъу цIыкIухэм ящыIэныгъэ фэгъэхьыгъэ тхыгъэ цIыкIухэр, еджэнымкIэ, спортымкIэ, культурэмкIэ, искусствэмкIэ гъэ­хъагъэу яIэхэр, Iофтхьабзэу зыхэлажьэхэрэр къытфатхых. КъыхэкIы, къадэмыхъугъэхэмкIи кIэлэцIыкIухэр къыддэгуащэхэу, ау аущтэу ренэу щытэп. Сыдигъуи мурад зыфэбгъэуцужьын ыкIи а лъагъом утетэу урыкIон фае.

Кушъу Бэллэ гъэхъагъэу иIэ­хэм тагъэгушIуагъ. ТыфэлъаIо тшIоигъу ренэу ыпэкIэ лъыкIотэнэу, насыпышIоу щыIэнэу.