ЫшIэзэ автомобилыр ыкъутагъ

Урысыем хэгъэгу кIоцI IофхэмкIэ и Министерствэ дознаниемкIэ иот­делэу Мыекъуапэ щыIэм илъэс 24-рэ зыныбжь кIалэм ылъэныкъокIэ уго­ловнэ Iоф къызэIуихыгъ.

Ащ лъапсэ фэхъугъэр Мыекъуапэ щыпсэурэ илъэс 32-рэ зыныбжь хъулъфыгъэм полицием зызэрэфи­гъэзагъэр ары. Полицием иучастковэ уполномоченнэм уплъэкIунхэр ышIызэ зэригъэунэфыгъэмкIэ, мы мафэм нэбгыритIум азыфагу зэмызэгъыныгъэ къитэ­джагъ. Зызэфэгубжхэм ыуж лажьэ зиIэм илъэс 32-рэ зыныбжь хъулъфыгъэм иавтомобилэу щытым еозэ фыкъуагъэхэр фишIыгъэх. Зэрарэу къалъытагъэр сомэ мин 20 фэдиз мэхъу.

Мы бзэджэшIагъэм къегъэлъагъо зэгурымыIоны-гъэу ыкIи зэдэоныгъэу цIыфхэм азыфагу къита­джэ­хэрэм апкъ къикIыкIэ ашIэзэ зыгорэм имылъку чIэнагъэ зэрэрагъэшIырэр. Ахэм икъоу къагурыIорэп мыщ фэдэ зекIуакIэм уголовнэ пшъэдэкIыжь зэрэпылъыр. Урысыем и Уголовнэ кодекс зэритхагъэмкIэ, мыщ фэдэ бзэджэшIагъэ зезыхьагъэхэм илъэситIум нэс хьапс атыралъхьан алъэкIыщт.

Гъогогъу 14-рэ цIыфхэр агъэпцIагъэх

АР-м хэгъэгу кIоцI IофхэмкIэ и Ми­нистерствэ къызэритырэмкIэ, илъэ­сы­кIэр къызихьагъэм щыублагъэу пэ­Iудзыгъэ шIыкIэм тетэу гъэпцIэн бзэ­джэшIэгъэ 14 фэдиз зэрахьагъэу Адыгеим щагъэунэфыгъ. Зэрарыр сомэ мин 500-м ехъу.

Тэхъутэмыкъое районым иполицие идежурнэ часть илъэс 30 зыныбжь бзылъфыгъэм зыкъыфигъэзагъ. Ащ къазэрафиIотагъэмкIэ, телефон номер зэфэшъхьафхэмкIэ пчъагъэхэу 8-495-…, 8-499-… къыригъа­жьэхэрэмкIэ сыхьат зэкIэлъыкIохэм бгъогъогогъо къыфытеуагъэх ыкIи финанс организацием иIофышIэ-­хэу къыраIуагъ. Банкым къырашIыкIэу бзылъфыгъэм ышIошъ агъэхъуи, икартэ тетхэгъэ пчъагъэхэр, кодыр къырагъэIуагъ. Нэужым ащ икартэ илъыгъэ сомэ мин 200-р гъэпцIакIохэм ратыгъукIыгъ. Мыщ фэдэ шIыкIэмкIэ илъэс 71-рэ зыныбжь хъулъфыгъэу Мыекъуа­пэ щыпсэурэри агъэпцIагъ. Сомэ мини 130-рэ ащ икартэ гъэпцIакIохэм рахыгъ.

Ащ нэмыкIэу Интернетыр къызыфагъэфедэзэ товархэм яIугъэкIынкIэ ыкIи фэIо-фашIэхэм ягъэцэкIэнкIэ бзэджэшIагъэхэр зэрахьагъэхэу бэрэ къыхагъэщыгъ. Илъэс 53-рэ зыныбжь хъулъфыгъэм товар къыригъэхьынэу сомэ мини 8 щакIом икартэ фыригъэхьагъ. Арэу щытми, товарыри щакIори ыгъоты­жьыгъэхэп. Джащ фэдэу социальнэ хъытыухэр къыз­фагъэфедэзэ цIыфхэм зэIуагъэкIэгъэ мылъкур бэрэ ашIуатыгъу. ГущыIэм пае, илъэс 22-рэ зыныбжь пшъэшъэжъыем ымышIэрэ цIыфым цыхьэ фишIыгъ ыкIи сомэ мин 30 икартэ фыригъэхьагъ.

Мы бзэджэшIагъэхэмкIэ уплъэкIун Iофтхьабзэхэр къулыкъушIэхэм зэрахьэх.

Мыщ фэдэ хъугъэ-шIагъэхэм ахэмыфэнхэм фэшI сакъыныгъэ къызхагъэфэнэу полицием иIофышIэхэр цIыфхэм къяджэх. Сыд фэдэрэ ушъхьагъукIи шъумы­шIэрэ цIыфым цыхьэ фэшъумышI, банкым къышъуи­тыгъэ картэм иномер, ащ тет пчъагъэхэр яшъумыIох.

Студентхэм афызэхащэ

Студентхэм я Мафэ ипэгъокIэу АР-м хэгъэгу кIоцI IофхэмкIэ и Ми­нистерствэ ведомствэм щызэхащэгъэ Общественнэ советыр иIэпыIэгъоу Урысые Iофтхьабзэу «Студенческий десант» зыфиIорэр зэхащэ.

АщкIэ мурадэу яIэр бгъу пстэумкIи хэгъэгу кIоцI къулыкъум иIофшIэн зыфэдэр цIыфхэм ягъэшIэгъэныр ары.

2021-рэ илъэсым щылэ мазэм и 19-м къыщегъэ­жьагъэу и 23-м нэс Адыгеим иапшъэрэ еджапIэхэм ястудентхэр ведомствэм икъулыкъу зэфэшъхьаф­хэм зы мафэкIэ стажировкэ ащахьы. Ащ нэмыкIэу Общественнэ советым иIофшIэн зэрэзэхэщагъэм, лъэкIэу яIэм ыкIи IофшIэкIо купэу япхыгъэхэм студентхэр ащагъэгъозагъэх.

Зэгуцафэхэрэр къаубытыгъ

Урысыем и МВД имежмуниципальнэ отделэу «Кощхьабл» зыфиIорэм икъулыкъушIэхэм илъэс 69-рэ зы­ныбжь пенсионерым ылъэныкъокIэ бзэджэшIэгъитIу зэрихьагъэу зэгуца­фэ­хэрэ хъулъфыгъэр къаубытыгъ.

Следствием зэригъэнафэрэмкIэ, тыгъуакIом унэм щагъэфедэрэ техникэр ыкIи электрическэ Iэмэ-псымэхэр гаражым чIитыгъукIыгъэх. Урысыем и Уголовнэ кодекс истатьяу 158-м къы­пкъырыкIыхэзэ уголовнэ Iоф къыфызэIуахыгъ.

Следственнэ-оперативнэ купым икъулыкъушIэхэм эксперт-криминалистхэр игъусэхэу тыгъун бзэджэшIагъэр зыщызэрахьагъэм пэгъунэгъоу уплъэкIунхэр щырагъэкIокIыгъэх, осым фэхъугъэ лъэкъопIэ ужхэр тырахыгъэх. Ахэм яшIуагъэкIэ илъэс 20 зыныбжь кIалэр къычIагъэщыгъ ыкIи къаубытыгъ. ЫпэкIэ ащ хьапс телъыгъ.

Полицием зэригъэунэфыгъэмкIэ, тIумкIи бзэджашIэм пчъэр хиути унэм ихьагъ. Уголовнэ кодексым истатья къызэригъэнафэу, ащ илъэси 6-м нэс хьапс тыралъхьан алъэкIыщт.

ПлIэгъогогъо наркотикхэр къапкъырахыгъэх

Урысыем хэгъэгу кIоцI IофхэмкIэ и Министерствэ наркотикхэр хэ­бзэнчъэу къезыгъэкIокIыхэрэм алъы­плъэгъэнымкIэ подразделением иот­делэу Мыекъуапэ щыIэм икъулы­къушIэхэм пэшIорыгъэшъ Iоф­тхьа­бзэ­хэр зэрахьэзэ ыпэкIэ хьапс зы­­телъыгъэ илъэс 40 зыныбжь хъулъ­фыгъэм егуцэфагъэх.

Хъулъфыгъэр къызалъыхъум, зыщыщыр амышIэрэ щыхьагъэр къыкъуагъотагъ. Нэужым эксперт-криминалистхэм зэрагъэунэфыгъэмкIэ, хъулъфыгъэм ыIыгъыгъэр наркотик зыхэлъ веществоу «соль» зыфаIорэр ары. МыщкIэ уголовнэ Iоф къызэIуахыгъ. Мыщ ехьщырэу джыри зы хъугъэ-шIагъэ къычIа­гъэщыгъ. Илъэс 59-рэ зыныбжь хъулъфыгъэу Мые­къуапэ щыпсэурэм наркотик зыхэлъ веществор къы­пкъырахыгъ. Ащ нэмыкIэу илъэс 27-рэ зыныбжь хъулъфыгъэм «экстази» зыфиIорэ наркотик зыхэлъыр ыIыгъэу къаубытыгъ.

Уголовнэ Iофхэр къызэIуахыгъэх, хэбзэгъэуцугъэр зыукъуагъэхэм илъэси 3-м нэс хьапс къахьын алъэ­кIыщт.

Ешъуагъэу рулым Iусыгъэх

Тэхъутэмыкъое районым иполицие икъулыкъушIэхэм пэшIорыгъэшъ Iоф­тхьабзэхэр зэхащэхэзэ мы районым щыщ илъэс 33-рэ зыныбжь хъулъфыгъэр къагъэуцугъ.

Ащ изекIокIэ-шIыкIэхэр зэрэмытэрэзым къулыкъу­шIэхэр егуцафэхи, медицинэ уплъэкIунхэр ышIынхэу агъэкIуагъ. Зэфэхьысыжьхэм къызэрагъэлъэгъуагъэм­кIэ, хъулъфыгъэр ешъуагъэу къычIэкIыгъ.

Нэужым зэрагъэунэфыгъэмкIэ, мыщ ыпэкIи ар ешъуагъэу къагъэуцуи, административнэ пшъэдэкIыжь рагъэхьыгъагъ. Хъулъфыгъэм уголовнэ Iоф къыфызэIуахыгъ, машинэр Iахи, хэушъхьафыкIыгъэ чIыпIэм щагъэуцугъ.

Къыхэгъэщыгъэн фае, 2021-рэ илъэсыр къызихьагъэм къыщыублагъэу ятIуанэу ешъуагъэу къагъэуцугъэ водительхэм щэгъогогъо уголовнэ Iофхэр къафызэIуахыгъэх. Ахэр зыщагъэунэфыгъэхэр Кощхьэблэ ыкIи Теуцожь районхэр ары.

Къэзыгъэхьазырыгъэр КIАРЭ Фатим.