Нэжъ-Iужъхэм анаIэ атырагъэтынэу зэзыщэлIэжьыгъэхэ унагъоу Адыгеим исхэм джыри тIу къахэхъуагъ. Джы ахэр 13 мэхъух.

Лъэпкъ проектэу «Демографием» ипхырыщын пае аштэгъэ федеральнэ программэу «Старшее поколение» зыфиIорэм къыдыхэлъытагъэу рес­публикэм щызэшIуахы­хэрэм ащыщ нэжъ-Iужъхэр учреждение гъэнэ­фагъэ амыщэхэу, зынаIэ атетын унагъо къазара­фагъотырэр.

— Япсауныгъэ къызыщыкIэкIэ, яфэIо-фашIэхэр зыфагъэцэкIэжьынхэ амал ямыIэжь мэхъу. Игу­псэ фэдэу зыштэн, лъыплъэн унагъо къафэгъо­тыгъэныр хэкIыпIэ дэгъу ащэхъу, — къыща-Iуагъ АР-м Iоф­шIэнымкIэ ыкIи социальнэ хэхъо­ныгъэмкIэ и ­Министерствэ ипресс-къулыкъу.

Ащ иотделэу социальнэ фэIо-фашIэхэр зыщагъэцэкIэрэ учреждениехэм афэгъэзагъэм ипащэ игуа­дзэу Мыгу Марыет къызэриIуагъэмкIэ, мыщ фэдэ IэпыIэгъур нэжъ-Iужъхэм нахь ягуапэу къыхахы хъу­гъэ, сыда пIомэ, якъуа­джэ е якъалэ дэмыкIыхэу ящыкIагъэм тетэу къаде­кIокIых.

Нанэм е татэм ынаIэ тетынэу унагъом ыштэным шапхъэу пылъ за­къор лъэныкъуитIури ащ фаехэу зэгурыIонхэр ары. ПсэукIэ амал тэрэзхэр яIэу яуахътэ зэрагъакIо­рэм нэмыкIэу, зэкъоныгъэри шъхьащыхыгъэ зэ­рэхъурэр ары мы

Iофым мэхьэнэ шъхьаIэу иIэр. Унагъом ущыпсэумэ, кIуа­чIэ къыпхелъхьэ, нахьыбэрэ ущыIэмэ пшIоигъу.

Ащ фэдэ IэпыIэгъу фае­хэм цIыфхэм социальнэ фэIо-фашIэхэр афэ­гъэ­цэкIэгъэнхэмкIэ Гупчэу зыпэблагъэхэм зыфагъэзэн фае.