Мыекъуапэ шъхьафит зашIыжьыгъэр илъэс 78-рэ мэхъу
Илъэс къэс Адыгеим икъэлэ шъхьаIэ шIэжь мэхьанэ зиIэ мафэу щылэ мазэм и 29-р хегъэунэфыкIы — 1943-рэ илъэсым мы мафэм нэмыц техакIохэр рафыжьыхи, Мыекъуапэ шъхьафит ашIыжьыгъ. ШIэжь мэхьанэ зиIэ мафэм ипэгъокIэу Мыекъуапэ шъхьафит зашIыжьыгъэр илъэс 78-рэ зэрэхъурэм епхыгъэ Iофтхьабзэхэм ярегъэкIокIын фэгъэхьыгъэ зэхэсыгъо зэхэщэкIо комитетым иIагъ. Ар зэрищагъ Мыекъопэ къэлэ администрацием ипащэ игуадзэу, Мыекъуапэ иветеранхэм я Совет итхьаматэу Юрий Томчак.
Республикэм икъэлэ шъхьаIэ шъхьафит зашIыжьыгъэм епхыгъэ мэфэкI Iофтхьабзэр Мыекъуапэ игупчэ мемориал щылэ мазэм и 29-м щыкIощт. Ветеранхэм ялIыкIохэм ыкIи ныбжьыкIэхэм хэгъэгур къэзыухъумагъэхэм яшIэжь агъэлъэпIэщт. Эпидемием пэшIуекIорэ санитарнэ Iофтхьабзэхэр ащ къыдыхэлъытэгъэщтых.
Нэужым урамэу Пионерскэм тет унэу 374-м Хэгъэгу зэошхом хэлэжьагъэу, полковникэу Михаил Богомоловым мыжъобгъу къыщыфызэIуахыщт. Мэрым игуадзэу Юрий Томчак къызэриIуагъэмкIэ, АР-м иветеранхэм я Совет ары мы Iофтхьабзэр зигукъэкIыр.