Спортым ныбджэгъу щызэфэ­хъугъэхэм язэфы­щыты­кIэ­хэр щыIэныгъэм зэрэ­щылъа­гъэ­кIуа­тэрэм тренерхэр къы­тегу­щы­Iэн­хэу тялъэIугъ.

Мыекъуапэ ягупч

Адыгэ къэралыгъо университетым ще­джа­гъэх, Мыекъопэ бэнэпIэ еджапIэм зыщагъэ­сагъ зэныбджэгъухэу Болэ Вадимрэ Улан Гуртуевымрэ. Зэнэкъокъухэм ахэлажьэхэзэ, батырхэм ямедальхэмкIэ тагъэ­гушIощтыгъ.

— Джырэ уахътэ Санкт-Петербург, Ленинград хэкум Iоф ащытэшIэ, кIэлэцIыкIу­хэмрэ ныбжьыкIэхэмрэ бэнакIэхэм афэтэгъасэх, — къаIуатэ Болэ Вадимрэ Улан Гуртуевымрэ. — Мыекъуапэ тикъэлэ гупсэу тэлъытэ. Сыдигъо тыкъэкIуагъэми, дэгъоу къыщытпэгъокIых.

У. Гуртуевымрэ В. Болэмрэ агъэсэрэ кIэлэцIыкIу 20 ягъусэу Мыекъуапэ къакIохи, Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм мэфи 7 щыIагъэх. БэнакIохэм егъэджэн зэIу­кIэгъухэр яIагъэх. Адыгеим итренерхэм, спортсменхэм гущыIэгъу афэхъугъэх. ЯIэпэIэсэныгъэ хагъэхъуагъэу Санкт-Петербург агъэзэжьыгъ.

— Мыекъуапэ изыгъэпсэфыпIэхэр, чIыпIэ дахэхэр, республикэм испорт еджапIэхэр Санкт-Петербург къикIыгъэхэм зэрагъэлъэгъугъэх, — къытиIуагъ Адыгэ Республикэм изаслуженнэ тренерэу Бастэ Сэлымэ.

— «Бысымхэм «тхьашъуегъэпсэу» ятIожьы тшIоигъу, — къыIуагъ Улан Гуртуевым. — Нахьыбэрэ тызэрэзэIукIэщтым те­гупшысэзэ, Санкт-Петербург тэгъэзэжьы.

Ермэлхьаблэ, ТIуапсэ ащыIагъэх

Адыгэ Республикэм дзюдомкIэ и Фе­дерацие ипащэу Лъэустэнджэл Мурат мылъкоу пэIухьащтымкIэ IэпыIэгъу къафэхъуи, тибэнакIохэр Ермэлхьаблэ, ТIуапсэ яспорт еджапIэхэм ащыIагъэх.

Ермэлхьаблэ бэнэкIо 30 агъакIуи, егъэ­джэн-зэIукIэгъу зэхахьэм хагъэлэжьагъэх. ТIуапсэ нэбгырэ 20 щыIагъ.

Адыгэ Республикэмрэ гъунэгъу Краснодар краимрэ язэдэпсэуныгъэ спортым щэпытэ. Тренерхэр, спортсменхэр зэIукIэгъу­хэм ягуапэу ахэлэжьагъэх.

Шъачэ зыщагъэхьазыры

Урысыем дзюдомкIэ ихэшыпыкIыгъэ коман­дэ иегъэджэн-зыгъэсэн зэIукIэгъухэр Шъачэ щэкIох.

Хэгъэгум дзюдомкIэ ихэшыпыкIыгъэ командэ итренер шъхьаIэу, Урысыем, Адыгеим язаслуженнэ тренерэу Тао Хьасанбый зэIукIэгъухэм пэщэныгъэ адызэрехьэ.

Адыгэ Республикэм дзюдомкIэ ибэнэпIэ спорт еджапIэ зыщызыгъасэхэу Мерэм Дамир, кг 60, Ордэн Андзаур, кг 66-рэ, Датхъужъ Алый, кг 90-рэ, хэгъэгум ихэшыпыкIыгъэ командэ хэтых.

— Мэфэ 25-рэ тизэIукIэгъухэр Шъачэ щыкIощтых, — къыIуагъ Тао Хьасанбый. —КIуачIэм, къулаим зэрэхагъахъорэм Iоф дэтшIэщт, бэнакIохэр зэнэкъокъухэм афэдгъэхьазырыщтых. Адыгеим щыщхэр дэгъоу тэшIэх, талъэплъэ.