Урысые политикэ партиеу «Единэ Россием», иволонтерхэм медицинэ уч­реж­дениеу республикэм итхэм вакцинэхэр, хэушъхьафыкIыгъэ пкъыгъо зэ­фэшъхьафхэр, лъыр, нэмыкIхэр рызэрахьанхэу Iалъмэкъ (термосумки) 36-рэ джырэблагъэ аратыгъ.

Ахэр «Единэ Россием» ифракцие хэт депутатхэм къаугъоигъэ ахъщэмкIэ къащэфыгъэх.

Зэпахырэ узым зызщиушъом­бгъурэ лъэхъаным медицинэм иIофышIэхэм ащ фэдэ Iалъмэкъхэр лъэшэу къашъхьэпэщтых. Темпе­ратурэ гъэнэфагъэ шапхъэу зыпылъхэм язехьанкIэ ар IэпыIэ­гъушхо хъущт.

— ГухэкIыми, коронавирусыкIэр къызэуалIэхэрэм япчъагъэ макIэ хъугъэу джыри пIон плъэкIыщтэп, — къыIуагъ АР-м псауныгъэр къэу­хъумэгъэнымкIэ иминистрэ игуадзэу Максим Коробко. — Игъом ыкIи тэрэзэу цIыфхэм анализхэр къаIыхыгъэнхэр узым пэшIуекIорэ Iофтхьэбзэ анахь шъхьаIэхэм ащыщ. Ахэм язещэн пай анахьэу мы Iалъмэкъхэр зэрэтищыкIагъэхэр. «Единэ Россием» идепутатхэм ренэу яшIуагъэ къытагъэкIышъ, лъэшэу тафэраз.

— «#СпасибоВрачам» зыфиIорэ Iофтхьабзэу партиер кIэщакIо зыфэхъугъэр лъытэгъэкIуатэ, — къыIуагъ «Единэ Россием» и ­Адыгэ шъолъыр къутамэ игъэцэкIэкIо Комитет ипащэу, Мыекъопэ къэлэ Советым хэтэу АфэшIэгъо Рэмэзанэ. — Медицинэм иIофышIэу коронавирусыр къызэолIагъэхэм афэгъэзагъэхэм зэкIэми «тхьа­шъуегъэпсэу» ятэIо. Термосумкэхэм IофшIэн къинэу агъэцакIэрэр къафигъэпсынкIэнэу тэгугъэ.

Шъугу къэдгъэкIыжьын, депу­татхэм медицинэм иучреждениехэмрэ ахэм яIофышIэхэмрэ Iэпы­Iэгъу ятыгъэным пае фонд агъэпсыгъ. 2021-рэ илъэсыкIэр къихьаным ыпэкIэ ыкIи ащ иапэрэ ма­фэ­хэм партием иволонтерхэм ме­дикхэм шIухьафтынхэр афашIыгъэх, яIоф­шIэнкIэ ящыкIэгъабэ афащэфыгъ.

ГущыIэм пае, «Единэ Россием» идепутатхэм Iоф зэрашIэрэ е яунэе транспортхэр медицинэм иIофы­шIэхэм афагъэзагъэх. Коронави­русыр къызэолIагъэхэр зэрэзэращэрэ санитарнэ автомашинэхэм гъэстыныпхъэр арагъэхъоным пае агъэфедэнэу картэхэр (топливные карты) аратыгъэх.

Джащ фэдэу илъэсыкIэ мэфэ­кIымкIэ зэкIэ медицинэм иIофышIэу коронавирусыр къызэолIа­гъэхэм афэгъэзагъэхэм, студентхэри, волонтерхэри зэрахэтхэу, IэшIу-IушIу къэмланэхэр аратыгъэх. Ащ фэдэу Iахь 2000 агъэхьазыри медицинэм иучреждениехэм аращэлIагъ.

COVID-19-м епхыгъэ упчIэхэр зыфагъазэрэ колл-гупчэм Iоф щызышIэхэрэм мафэ къэс щэджэгъошхэ стыр аIакIагъахьэ.

Лъым кислородэу хэтыр зыфэдизыр зэрауплъэкIурэ псэуалъи (пульсоксиметр) 120-рэ къащэфи, ахэри медицинэм иучреждениехэм атырагощагъэх.

Коронавирусыр къызэолIагъэхэм зыщяIазэхэрэ госпитальхэм чIыпIэу яIэхэм джырэблагъэ 260-рэ ахагъэхъуагъ. Мыекъопэ къэлэ сы­мэджэщыр ары ахэр зыщагъэпсыгъэхэр. «Единэ Россием» идепутатхэм зэхагъэхъогъэ ахъщэмкIэ мы отделением пае кIэлъын комп­лект 640-рэ къащэфыгъ.

Мары джырэблагъэ «#СпасибоВрачам» зыфиIорэ Iофтхьабзэм къыхиубытэу АР-м и Къэралыгъо Совет — Хасэм идепутатэу Болэкъо Мыхьамэт Джэджэ район сымэджэщым пае автомашинэу «газель» къыщэфыгъ.