Урысыем ишъолъырхэм Iоф ащы­зы­шIэрэ мысатыу орга­низа­цие­хэм къагъэхьазырыгъэ проект ми­ни­тIум ехъумэ 2021-рэ илъэсым те­лъытагъэу президент грантхэр къы­рахыгъэх.

Ащ фэдэ къэбар къытыгъ УФ-м и Президент и Администрацие ипащэ иапэрэ гуадзэу, грантхэр ятыгъэнымкIэ зэнэкъокъоу зэхащэхэрэм якоординационнэ совет итхьаматэу Сергей Кириенкэм.

Проект мини 10-м ехъу Iофтхьабзэм къырахьы­лIагъ. Ахэм ащыщэу къэралыгъом исубъект зэ­фэшъхьафхэм къырагъэ­хьыкIыгъэ проект мини­тIумэ текIоныгъэ афагъэшъошагъ. Адыгеим заявкэ 11 ытыгъагъ, 2-р анахь дэгъухэм ахэфагъэх. ­Адыгэ шъолъыр общест­веннэ шIушIэ организа­циеу «Добрые сердца» зыфиIорэр текIоныгъэ къы­дэзыхыгъэхэм ащыщ хъугъэ. Ащ проектэу «Центр развития особого ребенка «Добрые сердца» зыфиIорэр ыгъэхьазырыгъ.

— Сэкъатныгъэ ыкIи ипсауныгъэкIэ щыкIагъэ зиIэ кIэлэцIыкIухэр щы­Iэныгъэм хэгъэгъозэгъэнхэм проектыр фытегъэ­псыхьагъ. Мыщ къыдыхэлъытагъэу Тэхъутэмыкъое районымкIэ сэкъатныгъэ зиIэ кIэлэцIыкIухэм ыкIи Адыгэ шъолъыр общест­веннэ шIушIэ организациеу «Добрые сердца» зыфиIорэм хэтхэм специалистхэр IэпыIэгъу афэ­хъущтых. Ахэм яшIуагъэкIэ дунаир нахь дэгъоу сабыйхэм къагурыIощт, ялэгъухэм адэгущыIэнхэр нахь къафэпсынкIэщт, — къыщыхагъэщыгъ АР-м IофшIэнымкIэ ыкIи социальнэ хэхъоныгъэмкIэ и Министерствэ.

грант зэнэкъокъухэм республикэм илIыкIохэр чанэу ахэлажьэх, анахь дэгъухэм, къахагъэщыгъэ­хэм ахафэхэу бэрэ къы­хэкIы.

ТапэкIи мыщ фэдэ Iоф­тхьабзэхэм язэхэщэн шIо­гъэшхо къызэритыщтым щэч хэлъэп, Адыгейри ащ зэрифэшъуашэу ахэлэ­жьэ­ным фэхьазыр.

Абрэдж Сэтэнай.