ПцIыикъхэм япIалъэ икIыгъ

КъэкIыгъэхэу, илъэсыкIэ мэфэкIым пае къыраупкIи унэр агъэдэхэнэу агъэуцугъэ елкэхэм щылэ мазэм ыгу­зэгу нэс ныIэп къагъашIэрэр. Нэ­ужым ахэр хэкIитэкъупIэм ахьыжьых.

Хвое чъыгхэр пыдзэфэ инхэм ахэлъытагъэх.

Арышъ, къизыхыжьыхэрэм нэмыкI пыдзафэхэм ахамытакъоу, шъхьафэу агъэтIылъын фае. Къибдзыжьыным ыпэкIэ ар зэрэгъэдэхэгъагъэхэр зэкIэри пыпхыжьын фаеу зэрэщытыри шъугу къэтэгъэкIыжьы.

— Чъыгхэр пыдзэфэ инхэм афэгъэнэфэгъэ ба­кышхохэм аралъхьан фае. Ащ фэдэ щымытымэ, хэкIитэкъупIэ площадкэм тыралъхьэми хъущт. Контейнерэу нэмыкI пыдзафэхэм апае агъэуцугъэхэр елкэхэмкIэ аушъэхэ хъущтэп, ащ хэкIым иIущын къегъэхьылъэ, — къыIуагъ ООО-у «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый.

Къырахыжьыгъэ чъыгэу шъолъыр операторым къыу­гъоихэрэр Мыекъуапэрэ Адыгэкъалэрэ адэжькIэ ащагъэпсыгъэ хэкIитэкъупIэхэм арещалIэ.

Мыгъэнэфэгъэ чIыпIэм щашIыгъагъ

Адыгеим икъэлэ шъхьаIэ идэкIыгъо­хэм ащыщ хэбзэнчъэу щашIыгъэгъэ хэкIитэкъупIэр шъолъыр операторым Iуихыжьыгъ. Дачэ товариществэу «Птицевод» зыфиIорэм дэжь ар зы­щагъэпсыгъагъэр, хэкI кубометри 180-рэ ­Iулъыгъ.

— Тиавтомашинэхэм хэкIыр игъом ыкIи икъоу псэупIэхэм ащыIуащы хъугъэ, республикэм щыпсэу­хэрэми, юридическэ лицэхэми пыдзафэхэр шъолъыр операторым ратынхэу амал яI. Ау ащ пае къэмынэу джыри зыщымыгъэнэфэгъэ чIыпIэхэм итэкъупIэхэр ащашIых, — къыIуагъ «ЭкоЦентрэм» и Адыгэ шъо­лъыр къутамэ экологием ишапхъэхэм ягъэцэкIэн лъыплъэгъэнымкIэ испециалистэу Алексей Петровым.

Шъугу къэтэгъэкIыжьы, зыщымыгъэнэфэгъэ чIыпIэм хэкIитэкъупIэ щызышIырэм административнэ пшъэ­дэкIыжь ыхьынэу законым къыщыдэлъытагъ.

Организациехэм пыдзафэхэр Iуащыным пае мы номерхэмкIэ лъэIу тхылъыр къатын алъэкIыщт: 8(8772)21-06-04, 8.918-425-96-22, интернет нэкIубгъор къызфагъэфедэми хъущт. Мары адресыр: https://adygea.clean-rf.ru.

Осым къызэрихъокIыгъ

Тэхъутэмыкъое ыкIи Теуцожь рай­он­хэм осышхоу къащесыгъэм шъо­лъыр операторым хэкIыр зэрэ­Iуи­щырэ графикым зэхъокIыныгъэхэр фишIыгъэх.

ХэкIитэкъупIэм екIолIэрэ гъогур амытхъугъэмэ, хьылъэзещэ автомашинэшхоу пыдзафэхэр Iузыщырэр площадкэм екIолIэшъурэп.

— Тиспециалистхэм площадкэ пэпчъ иекIолIапIэ изытет зэрагъашIэзэ автотранспортыр зэраIухьащтыр агъэнафэ. Экипажхэр площадкэм Iумыхьашъугъэхэми, хэкIыр къыIуащыгъэми, къэбарыр къытлъагъэIэсы. УзэкIолIэн умылъэкIырэ чIыпIэхэм анаIэ тет, амал горэ къызэрэхъугъэм тетэу контейнерхэр ащызэблахъух. Муниципалитетхэми зэпхыныгъэ адытиI, хэкIитэкъупIэ площадкэхэм узэрякIолIэщтыр арагъэт­хъунэу ахэм пшъэрылъ яI, — къыIуагъ «ЭкоЦентрэм» и Адыгэ шъолъыр къутамэ иподразделение ипащэу Алыбэрд Айдэмыр.

ХэкIым иIущынкIэ упчIэ зиIэр мы телефонхэмкIэ къытеон ылъэкIыщт: 8.962-868-12-29, 8.800-707-05-08.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу