Адыгэ электрическэ сетьхэм яэлектрикхэм Мыекъуапэ щагъэуцурэ къэгъэлъэгъон комплексэу «Национальная Золотая кладовая» зыфиIорэр электричествэм икъэкIуапIэхэм апашIагъ.

— Ащ пае лъэхъаным ишапхъэхэм адиштэу гъэпсыгъэ трансформатор киловольт-ампер 250-рэ кIуачIэ иIэу дгъэуцугъэ, киловольти 110-рэ зыкIочIэ подстанциеу «Северная» зыфиIорэм къикIэу кIуапIэ дгъэ­псыгъэ, — къыIуагъ «Россети Кубань» и Адыгэ шъолъыр къу­тамэ ипащэу Рустам Маг­деевым.

Комплексэу зигугъу къэтшIырэр дунаим щызэлъашIэрэ ювелирэу ыкIи IэшэшIэу Еутых Асе ипроектэу щыт, зэрэгъэпсыгъэщтыр къэзыугупшысыгъэри ары. Мыекъопэ къэлэ паркым псэуалъэр щагъэуцу. Аухэу затIупщыкIэ, ащ чIэхьащтхэм мастерым иIэшIагъэхэм анэмыкIэуи, ащ Iоф зыщишIэхэрэри, ювелирнэ псэуалъэхэр зэри­шIыхэрэри щалъэгъунхэ амал яIэщт. Ащ пае гъучIыр зыщагъэ­тI­кIурэ хьаку щагъэуцу. Джащ фэдэу пкъыгъоу щашIыгъэхэр зыщыIуагъэкIырэ щапIэхэри хэтыщтых.

Мы уахътэм зэпахырэ узым зимыушъомбгъуным пае гъунэпкъэ гъэнэфагъэхэр зэрэщыIэхэр къыдэлъытагъэу, «Россети Кубань» и Адыгэ шъолъыр къутамэ пэIудзыгъэ шIыкIэм тетэу иIоф­шIэн лъегъэкIуатэ. Электричествэм епхыгъэ фэIо-фашIэ зи­щы­кIагъэм интернет нэкIубгъоу «Портал-тп.рф» зыфиIорэр ыгъэфедэнышъ, ащкIэ лъэIу тхылъыр къытын ылъэкIыщт. Джащ фэдэу упчIэ зиIэр е IэпыIэгъу зищыкIагъэр мы телефонымкIэ къытеоми хъущт: 8.800-220-0-220.