Лъэпкъ проектэу «Демографием» ипхырыщын Адыгеим щылъагъэкIуатэ. Ащ къыдыхэлъытагъ щыIэныгъэм чIыпIэ къин ригъэуцогъэ унагъохэм IэпыIэгъоу аратырэр. Социальнэ зэзэгъыныгъэм къыпкъырыкIыхэзэ къэралыгъо IэпыIэгъоу Адыгеим щатырэм пэIуагъэхьащтыр, блэкIыгъэ илъэсым егъэпшагъэмэ, 2021-м фэдэ 30-кIэ нахьыбэ ашIыгъ. Ар сомэ миллион 86,6-рэ зэрэхъурэр.

АР-м IофшIэнымкIэ ыкIи социальнэ хэхъоныгъэмкIэ и Министерствэ къызэрэщаIуагъэмкIэ, цIыфым ахъщэкIэ е нэмыкIэу ищыкIагъэмкIэ IэпыIэгъу социальнэ учреждением къыритыным, программэу ащ фэгъэхьыгъэм къыщыдэлъытагъэхэр ежь ыгъэцэкIэнхэм афэгъэхьыгъэ зэзэгъыныгъэу зэдашIырэр ары «социальнэ кантракт» зыфаIорэр.

Ащ мэзищым къыщегъэжьагъэу илъэ­сым нэсэу пIалъэ иI. Лъэныкъоу къыщыдэлъытагъэхэр:

— цIыфхэм IофшIэпIэ чIыпIэхэр ятыгъэнхэмкIэ къулыкъур къыхагъэлажьэзэ IофшIапIэ къыфагъотынэу;

— сэнэхьат гъэнэфагъэ фырагъэ­джэнэу е гъэсэныгъэ тедзэ рагъэгъотынэу;

— предприниматель Iоф къызэIуихыным пае деIэнхэу;

— унэгъо хъызмэт ыгъэпсынымкIэ IэпыIэгъу ратынэу;

— нэмыкI Iофтхьабзэхэу чIыпIэ къиным унагъор къизыщыщтхэр.

Ахъщэ IэпыIэгъоу программэм къыщыдэлъытагъэр сомэ мин 250-рэ зэрэхъу­рэр. АщкIэ оборудование, щагу бзыухэр, былымышъхьэхэр е нэмыкIэу хъызмэтым ищыкIагъэхэр къыщэфынхэ ылъэкIыщт, псэуалъэу зыщиIыгъыщтхэр ыгъэуцуми хъущт.

Iофтхьабзэхэр зэкIэри унагъом ежь— ежьырэу зиIыгъыжьын ылъэкIынэу шIыгъэ­ным фытегъэпсыхьагъэх. Зэзэгъыны­гъэм щыгъэнэфэгъэ пшъэрылъхэр зэригъэцакIэхэрэм лъыплъэщтых, ахэр укъуа­гъэу къычIэщымэ, тхылъыр зэкIахьажьыщт.

Мыщ фэдэ IэпыIэгъу зищыкIагъэхэр IофшIэнымкIэ ыкIи цIыфхэр социальнэу ухъумэгъэнхэмкIэ Гупчэм е ащ икъутамэу зыщыпсэурэ чIыпIэм пэблагъэм екIолIэнхэ алъэкIыщт. Телефоныр: 8(8772)52-52-88.