Анахь дэгъухэр къыхагъэщыгъэх
УФ-м ПенсиехэмкIэ ифонд зызэхащагъэр илъэс 30 хъугъэ. МэфэкIым фэгъэхьыгъэ зэхахьэу фондым и Къутамэу АР-м щыIэм щыкIуагъэм ащ иIофышIэу тынхэр къызфагъэшъошагъэхэм ахэр къэзыушыхьатырэ тхылъхэмрэ бгъэхалъхьэхэмрэ Къутамэм ипащэу Къулэ Аскэрбый щаритыжьыгъэх.
Фондым иIофшIэн иIахь мымакIэу зэрэхилъхьэрэм фэшI «УФ-м ПенсиехэмкIэ ифонд иIофышIэ гъэшIуагъ» зыфиIорэ тамыгъэмкIэ къыхагъэщыгъэх страхование зышIыгъэхэм фитыныгъэу яIэхэм уасэ афэшIыгъэнымкIэ купым ипащэу Дэгумыкъо Фатимэ, Къутамэм иотделэу социальнэ ахъщэ тынхэм афэгъэзагъэм ипащэу ХьэцIыкIу Маринэ.
Джащ фэдэу УФ-м ПенсиехэмкIэ ифонд и Щытхъу тхылъ къафагъэшъошагъ делопроизводствэмкIэ купым ипащэу Мэрэтыкъо Эммэрэ пенсиехэм ягъэнэфэн ыкIи якIэлъытыкIыжьын фэгъэзэгъэ отделым испециалист шъхьаIэу Любовь Миронцовамрэ.
«УФ-м ПенсиехэмкIэ ифонд иотличник» зыфиIорэ цIэмкIэ къыхагъэщыгъэх Тэхъутэмыкъое районымкIэ ГъэIорышIапIэм ипащэу Цуекъо Саидэрэ Къутамэм иотделэу нэбгырэ пэпчъ учет шIыгъэным фэгъэзагъэм испециалист шъхьаIэу Маргарита Татосянрэ.
УФ-м ПенсиехэмкIэ ифонд и Правление и Тхьаматэ ирэзэныгъэ тхылъ къыратыгъ къэбар ухъумэным фэгъэзэгъэ отделым испециалист шъхьаIэу Кудэйнет Артур, Къутамэм и Щытхъу тхылъ къыфагъэшъошагъ къэбарлъыгъэIэс шIыкIакIэхэмкIэ отделым испециалист шъхьаIэу Чэркэзи Мэндэрэс.
ТиIофшIэгъоу тынхэр къызэратыгъэхэм тыгу къыддеIэу тафэгушIо, гъэхъагъэхэмкIэ яIофшIэн лъагъэкIотэнэу тафэлъаIо!
УФ-м ПенсиехэмкIэ ифонд и Къутамэу АР-м щыIэм ипресс-къулыкъу