Гъэсэныгъэм ылъэныкъокIэ республикэ зэнэ­къокъоу зэхащагъэхэм текIоныгъэр ыкIи ха­гъэунэфыкIырэ чIыпIэхэр къащыдэзы­хыгъэхэр тыгъуасэ АР-м и Къэралыгъо филармоние щагъэшIуагъэх.

Мы илъэсым гъэхъэгъэшIу зышIыгъэхэм къафэгушIуагъ ыкIи къалэжьыгъэхэр къаритыжьыгъ Адыгеим и ЛIышъхьэу КъумпIыл Мурат.

Iофтхьабзэм хэлэжьагъэх АР-м и Къэралыгъо Совет —Хасэм и Тхьаматэу Владимир Нарожнэр, республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур, кIэлэегъаджэхэр, нэмыкIхэри.

Адыгеим и ЛIышъхьэ къызэриIуагъэмкIэ, кIэлэегъаджэм имэхьанэ зыкъегъэIэтыгъэныр, мы сэнэхьатым анаIэ тырадзэныр ары мыщ фэдэ зэнэкъокъу­хэм пшъэрылъ шъхьаIэу яIэр.

— Непэ дунаир псынкIэу зэ­хъокIы, технологиякIэхэр къе­жьэх. Ащ дакIоу ясэнэхьаткIэ специалистхэм ашIэн фаеми хэхъо зэпыт. ШIэныгъэ куу, аужырэ шапхъэхэм адиштэрэ екIолIакIэхэр зыгъэфедэрэ кIэлэегъаджэхэр арых джырэ еджа­пIэм ищыкIагъэхэр, — къыIуагъ КъумпIыл Мурат.

Гъэсэныгъэм хэхъоныгъэ ышIыным, кIэлэегъаджэхэм ыкIи кIэлэпIухэм IэпыIэгъу афэхъугъэным фытегъэпсыхьэгъэ ­лъэпкъ проектхэм ыкIи къэ­ралыгъо программэхэм ягъэцэ­кIэн республикэм ипащэ анахьэу ынаIэ атыридзагъ. Ащ амалэу къатыхэрэр гъэфедэ­гъэнхэм мэхьанэшхо иIэу ылъы­тагъ. Мы илъэсым Iоныгъом и 1-м шъолъырым иеджапIэхэм кIэлэегъэджэ ныбжьыкIи 143-мэ яIофшIэн ащаублагъ.

— Непэрэ шапхъэхэм ади­штэрэ гъэсэныгъэм иинфраструктурэ тэгъэпсы, ащ къыды­хэлъытагъэу еджапIэхэр, кIэлэцIыкIу IыгъыпIэхэр тэшIых ыкIи тэгъэцэкIэжьых. Мы лъэны­къомкIэ IофшIэнышхо зэшIотэхы. АщкIэ зишIогъэшхо къытэкIы­хэрэр шъощ фэдэ пэрытныгъэ зыIыгъ тикIэлэегъаджэхэр арых, — къыIуагъ Адыгеим и ЛIы­шъхьэ. ПрофмастерствомкIэ зэхащэрэ зэнэкъокъухэм джыри тIу къазэрэхэхъуагъэр респуб­ликэм ипащэ къыIуагъ. Ахэм зэу ащыщ адыгабзэр ыкIи литературэр языгъэхьырэ кIэлэегъэджэ анахь дэгъум икъыхэхын.

Нэужым кIэлэегъаджэхэм къалэжьыгъэ тын лъапIэхэр рес­публикэм ипащэ аритыжьыгъэх. ЩытхъуцIэу «АР-м лъэпкъ гъэсэныгъэмкIэ изаслуженнэ IофышI» зыфиIорэр фагъэшъошагъ Мыекъопэ индустриальнэ техникумым Iут ЛIэхъусэжъ Наталье. Адыгеим и ЛIышъхьэ ирэзэныгъэ тхылъхэр афагъэшъошагъэх Адыгэ республикэ еджэпIэ-интернатым икIэлэпIу иIэпыIэгъоу Татьяна Величко, мыщ чIэс Богдан Одинцовым, студенткэу Алена Комаровам.

Адыгеим и ЛIышъхьэ идиплом къалэжьыгъ лъэныкъо зэфэ­шъхьафхэмкIэ текIоныгъэ къыдэзыхыгъэхэ IофышIэхэу Сергей Левченкэм, Алхъо Саидэ, Мамый Саидэ, Шышыкъо Сусаннэ, Диана Фичкинам.

ХагъэунэфыкIырэ чIыпIэхэр къыдэзыхыгъэхэми республикэм ипащэ идипломхэр аратыжьыгъэх. Ахэр: кIэлэегъаджэхэу Бэшкэкъо Симэ, Марина Гриша­ковар, Каталин Вереш, Оксана Качановар. КIэлэпIухэу — Татьяна Улатовар, Пэнэшъу Хъарет. АдыгабзэмкIэ кIэлэегъэджэ анахь дэгъухэу Сэмэгу Сусаннэрэ Мыгу Анжелэрэ. Джащ фэдэу къыхагъэщыгъэх Лейла Алиакберовар, Валентина Софрыжовар, Оксана Ушаковар, Маргарита Фарафоновар.

Мыхэм зэкIэми КъумпIыл Мурат афэгушIуагъ, тапэкIи гъэ­хъэгъэшIухэр ашIынхэу афэ­лъэIуагъ.

АР-м и ЛIышъхьэ ипресс-къулыкъу