Адыгэ Республикэм и ЛIышъхьэу КъумпIыл Муратрэ Урысые Федерацием экономикэ хэхъоныгъэмкIэ ими­ни­стрэу Максим Решетниковымрэ зэIукIэгъу Москва щы­зэ­дыряIагъ.

Республикэм социальнэ-экономикэ хэхъоныгъэу ышIыгъэхэм ахэр атегущы­Iагъэх, Адыгеим иэкономикэ амалхэм зыкъызэ­Iуязыгъэхыщт проектхэм анахьэу анаIэ атырагъэтыгъ. Ахэм ахэхьэх къушъхьэ кластерым иинфраструктурэ гъэпсыгъэныр, индустриальнэ парк Тэ­хъу­тэмыкъое районым щы­шIыгъэныр.

Республикэм исоциальнэ-экономикэ Iофхэм язытет фэгъэхьыгъэу Адыгеим и ЛIышъхьэ къыIотагъ, пандемием нахь макIэу зэрар Адыгеим иэкономи­кэ къырихынымкIэ ашIэ­хэрэм атегущыIагъэх. Ана­хьэу ахэр зэпхыгъэхэр къэ­ралыгъо программэхэм, лъэпкъ проектхэм амалэу республикэм къыратхэрэр нахьыбэу шIуагъэ къытэу къызфигъэфедэнхэр ары.

Адыгеим социальнэ-экономикэ хэхъоныгъэ зэри­шIыщт унэе программэм республикэмкIэ мэхьанэшхо зэриIэр КъумпIыл Му­рат хигъэунэфыкIыгъ. Правительствэр IэпыIэгъу къафэхъузэ, а программэм игъэцэкIэн мыгъэ фежьагъэх. Республикэм экономикэ амалэу иIэхэм зыкъызэIуязыгъэхыщт Iоф­тхьабзэхэу зэрахьащтхэр программэм щагъэнэфа­гъэх. Паркхэу агъэпсыщтхэри ащ фэIорышIэщтых.

Республикэм ипащэ къы­зэрэхигъэщыгъэмкIэ, ахэм яшIуагъэкIэ респуб­ликэм инвестициеу къыхалъхьэхэрэр нахьыбэ хъущт, предпринимательствэм Адыгеим нахь зыщиушъомбгъущт. Тэхъутэмыкъое районым индуст­риальнэ паркэу щагъэпсырэри ащ фэдэ гухэлъхэм афэIорышIэщт.

КъумпIыл Мурат проектым иконцепцие зэIукIэ­гъум къащыхилъхьагъ, ащ федэу пылъхэм, транспорт инфраструктурэ дэгъу зэриIэм анаIэ тыраригъэ­дзагъ. Промышленнэ шъо­лъырэу зэхащэщтым производственнэ предприя­тие­хэмрэ складхэмрэ ща­гъэ­псынхэу рахъухьэ. Про­мышленнэ шъолъырым ищыкIэгъэ инфраструктурэр гъэпсыгъэнымкIэ, экономическэ шъолъыр хэушъхьафыкIыгъэ ащ щызэхэщэгъэнымкIэ Урысыем экономикэ хэхъоны­гъэмкIэ и Министерствэ республикэм IэпыIэгъу къы­ритын зэрэфаер Адыге­им и ЛIышъхьэ къыIуагъ.

ЗекIоными, республикэм иэкономики хэхъоныгъэ языгъэшIыщт лъэныкъоу хъун ылъэкIыщт курортэу «Лэгъо-Накъ» зыфиIорэр. Проектым диштэу гъогу километрэ 36-рэ агъэ­псы­нэу рахъухьэ. Проектым ишIуагъэкIэ IофшIэпIэ чIыпIэ мини 2 фэдиз зэха­щэщт. Адыгэ Республикэм хэхъоныгъэ зэришIыщт унэе программэм къызэрэ­щыдэлъытагъэмкIэ, гъогу инфраструктурэри, курор­тэу «Лэгъо-Накъ» зыфи­Iо­рэм электроэнергиер къы­IэкIэзгъэхьащт псэуалъэ­хэри агъэпсыщтых.

Шъугу къэтэгъэкIыжьы мы программэм игъэцэкIэн пае 2021-рэ илъэсым сомэ миллиард федеральнэ бюджетым Адыгеим къызэрэфыхагъэкIыщтыр. А мылъкур автомобиль гъогоу Дахъорэ Лэгъо­-На­къэрэ зэзыпхыхэрэм, газ станциеу поселкэу Красно­октябрьскэм дэтым ягъэ­кIэжьын, сабыибэ зэрыс унагъохэм унэ зыщашIыщт чIыгу Iахьхэу аратыгъэхэм яинженер инфраструктурэ игъэпсын апэIуагъэхьащт.

Максим Решетниковым зэрэхигъэунэфыкIыгъэмкIэ, къушъхьэ курортыкIэ Адыге­им щызэхэщэгъэ­нымкIэ Урысыем экономикэ хэхъоныгъэмкIэ и Ми­нистерствэ IэпыIэгъу къаритыщт. Унэе инвес­ти­циехэр къазэрахалъхьащтхэмкIэ, республикэм хэ­хъоныгъэ зэришIыщт унэе программэр зэрагъэцэ­кIэщт графикымкIэ зэдырагъэштэнхэм мэхьанэшхо зэриIэр ащ къыIуагъ.

«Архызрэ Мамисонрэ ащыIэ курортхэм афэдэхэр Кавказым бэу щыд­гъэпсыщтых. Урысыем и Къыблэ къушъхьэ кластер гъэшIэгъон щызэхэтщэн тлъэкIыщт», — къыIуагъ Максим Решетниковым.

КъумпIыл Мурат Урысые Федерацием экономикэ хэхъоныгъэмкIэ иминистрэ IэпыIэгъу къазэрафэ­хъурэм фэшI тхьэуегъэпсэу риIуагъ, республикэмкIэ мэхьанэшхо зиIэ пшъэрылъхэм язэшIохынкIэ федеральнэ гупчэм зэдэлэжьэныгъэу дыряIэр нахь агъэпытэн зэрэфаер хи­гъэунэфыкIыгъ.

Адыгэ Республикэм и ЛIышъхьэ ипресс-къулыкъу