КъулыкъушIэхэм афэгушIуагъ
Урысые Федерацием икъулыкъоу цIыфхэм якъэгъэнэжьын фэгъэзагъэм иIофышIэ и Мафэрэ Урысыем и МЧС зызэхащагъэр илъэс 30 зэрэхъугъэмрэ афэгъэхьыгъэ зэIукIэр тыгъуасэ Адыгэ Республикэм и Правительствэ зычIэт унэм щыкIуагъ.Адыгэ Республикэм и ЛIышъхьэу КъумпIыл Мурат ясэнэхьат епхыгъэ мэфэкIымкIэ къэзэрэугъоигъэхэм къафэгушIуагъ, еIолIэнчъэу япшъэрылъ зэрагъэцакIэрэм пае МЧС-м иIофышIэхэм тхьэшъуегъэпсэу ариIуагъ. МЧС-м иподразделениехэр Адыгэ Республикэм щызэхэзыщэгъэ ветеранхэм афэгъэхьыгъэуи республикэм ипащэ гущыIэ фабэхэр къыIуагъэх.
«ЧIыпIэ зэжъу ифагъэхэм IэпыIэгъу язытын, чIыопс тхьамыкIагъохэм къыздахьыгъэхэм ядэгъэзыжьын хэлэжьэн зылъэкIыщтхэр лIыгъэшхорэ IэпэIэсэныгъэ инрэ зыхэлъхэр ары. Шъо шъуиIоф хэшIыкIышхо зэрэфышъуиIэм ишIуагъэкIэ цIыфхэри чIыпIэхэри ошIэ-дэмышIэ тхьамыкIагъохэм ащыухъумагъэ мэхъух», — къыIуагъ Адыгеим и ЛIышъхьэ.
КъумпIыл Мурат зэрэхигъэунэфыкIыгъэмкIэ, хэбзэ къулыкъухэми цIыфхэм якъэгъэнэжьын фэгъэзэгъэ къулыкъухэми пандемием земыгъэушъомбгъугъэнымкIэ, граждан оборонэмкIэ, машIом зыкъымыштэнымкIэ гъусэныгъэ пытэ зэдыряI. Iофхэм язытет цIыфхэм агурыгъэIогъэнымкIэ ахэм Iофышхо ашIэ.
НепэкIэ пшъэрылъ шъхьаIэхэм ащыщ цIыфхэр къызэрагъэнэжьрэ джырэ технологиехэр, уплъэкIунхэр зэрэзэхащэрэ, цIыфхэм макъэ зэрарагъэIурэ амалхэр къызфэгъэфедэгъэнхэр. Адыгеим и ЛIышъхьэ Урысыем и МЧС Адыгэ РеспубликэмкIэ и ГъэIорышIэпIэ шъхьаIэ игъо филъэгъугъ республикэм иволонтерхэм гъусэныгъэу адыряIэр нахь ыгъэпытэнэу.
ЦIыфхэр, анахьэу кIэлэцIыкIухэр, зыкIодхэкIэ обществэр нахь зэрэзэкъоуцорэм ищыс бэмышIэу кIэлэцIыкIоу кIодыгъэр зэхахьэхи Мыекъуапэ къызэрэщагъотыжьыгъэр. Адыгеим и ЛIышъхьэ илъэс 16 зыныбжь Быжь Дамир лIыгъэ къызэрэзхигъэфагъэр, зыныбжь хэкIотэгъэ бзылъфыгъэр ащ машIом зэрэщиухъумагъэр хигъэунэфыкIыгъ. КIалэр зэIукIэм хэлэжьагъ, Адыгэ Республикэм и ЛIышъхьэ ирэзэныгъэ тхылъ мыщ къыщыратыжьыгъ.
ЗэIукIэм икIэух тынхэр аратыжьыгъэх. МЧС-м иIофышIэхэу гъэхъагъэ зышIыгъэхэм Адыгэ Республикэм и ЛIышъхьэ ирэзэныгъэ тхылъхэр, Адыгэ Республикэм и Къэралыгъо Совет — Хасэм ирэзэныгъэ тхылъхэр, ведомствэ тынхэр афагъэшъошагъэх.
Адыгэ Республикэм и ЛIышъхьэ ипресс-къулыкъу