Адыгеим мылъку тедзэ къыфыхагъэкIыгъ
Лъэпкъ проектэу «ПсэупIэмрэ къалэм изэтегъэпсыхьанрэ» зыфиIорэм къыдыхэлъытагъэу Урысые Федерацием ишъолъырхэм къэралыгъо программэр ащыгъэцэкIэгъэнхэм къэлэ щыIакIэр нахьышIу шIыгъэным тегъэпсыхьэгъэ муниципальнэ программэхэм бюджет субсидиехэу атырагощагъэхэм зэхъокIыныгъэу афашIыщтхэр мы тхьамафэм Урысые Федерацием и Правительствэ ыухэсыгъэх.
А гухэлъхэм апае 2020-рэ илъэсым Адыгеим сомэ миллион 63,2-м ехъу мылъку тедзэу къыфыхагъэкIыгъ. Зигугъу къэтшIыгъэ къэралыгъо программэр гъэцэкIэгъэным пае мыгъэ республикэм сомэ миллиони 189,4-м ехъу къыфатIупщыгъ.
Урысые Федерацием и Къэралыгъо Совет изэхэсыгъоу Урысые Федерацием и Президентэу Владимир Путиным тыгъоснахьыпэ зэрищагъэм зыфагъэхьазырзэ, шъолъырхэм мылъку тедзэ къафыхэгъэкIыгъэным ехьылIэгъэ унашъор аштагъ. Iофтхьабзэм хэлэжьагъэхэр лъэпкъ проектхэмрэ къэралыгъо программэхэмрэ зэрагъэцакIэхэрэм тегущыIагъэх.
Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, пандемием илъэхъан федеральнэ IэпыIэгъоу къыIукIэрэм ишIуагъэкIэ республикэм псынкIэу ипшъэрылъхэр ыгъэцэкIэнхэ ыкIи экономикэ процессхэр къызэтыримыгъэуцон елъэкIы.
«Коронавирусым зыкъызэриштагъэм емылъытыгъэу ыпэкIэ тылъыкIотэным ыкIи экономикэ амалэу тиIэхэм ахэдгъэхъоным мэхьанэшхо иI. Федеральнэ гупчэм шъолъырхэм ренэу IэпыIэгъу къазэраритрэм ишIуагъэкIэ бюджет Iофхэр гъэпсыгъэ мэхъух, лъэпкъ проектхэмрэ къэралыгъо программэхэмрэ тэгъэцакIэх», — къыIуагъ КъумпIыл Мурат.
Мылъку тедзэ шъолъырхэм къафыхэгъэкIыгъэным ехьылIэгъэ унашъор Урысые Федерацием и Правительствэ зиштагъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары. Адыгеим ыцIэкIэ Урысые Федерацием и Къэралыгъо Думэ идепутатэу Владислав Резник ащкIэ ишIуагъэ къыгъэкIуагъ.
«ПсэолъэшIыным, къызэхэонкIэ щынагъоу щыт унэхэм цIыфхэр къачIэщыжьыгъэнхэм, щагухэм-рэ общественнэ чIыпIэхэмрэ язэтегъэпсыхьан республикэм мэхьанэшхо щараты. Къэлэдэсхэм ящыIэкIэ-псэукIэ зыкъегъэIэтыгъэным тегъэпсыхьэгъэ программэм пае федеральнэ гупчэм мылъку тедзэ къызэрэхигъэкIырэм ишIуагъэкIэ республикэм бюджет Iофхэр нахьышIу щыхъущтых, къалэхэм язэтегъэпсыхьанкIэ пшъэрылъэу яIэхэр агъэцэкIэщтых», — къыIуагъ Владислав Резник.