Урысые Банкымрэ статистикэмкIэ Федеральнэ къулы­къумрэ уплъэкIунэу ашIыгъэхэм къызэрагъэнэфагъэмкIэ, Адыгеим гъомылапхъэхэр къыщылъэпIагъэхэ нахь мы­шIэми, адыгэ лъэпкъ шхыныгъохэр зыхашIыкIырэ къуаем, мэлылым ыкIи былымылым ауасэ зэрэхахъорэр къызэ­теуцуагъ.

— Адыгеир пштэмэ, илъэс инфляциер шэкIогъу мазэм проценти 5,2-м нэсыгъ ыкIи Урысыем, Къыблэ Федеральнэ шъо­лъырым уасэхэр зэра­щыдэкIуаерэм шъхьарыкIыгъ. Ащ бэ фэIоры­шIагъэр. ГущыIэм пае, сомэм ыкIуачIэ къызэ­реIыхыгъэр, лэжьыгъэу къаугъоижьыгъэр зыфэ­дизыр, логистикэр, зекIоным ылъэныкъо изытет, — къыIуагъ Лъэпкъ Бан­кым и Къутамэу АР-м щы­Iэм ипащэу Сергей Самойленкэм.

Гъомылапхъэхэм яинфляцие зиягъэ езгъэкIыгъэхэм ащыщ шъоущыгъум ыуасэ зэрэдэкIоягъэр. Коцыр къызэлъапIэм хьалыгъури, нэмыкIэу хьа­джыгъэм хашIыкIыхэрэри къэлъэпIагъэх, ау ащ пае къэмынэу макаронхэм ауасэ республикэм къыщызэтенагъ.

Мэлылым, былымылым, адыгэ къуаем ауасэ къызэтеуцуагъ. Сыда пIомэ, чэтылыр зэрэнахь пыутым фэшI, цIыфхэм нахь ащэфы, пчэныщэм хэшIыкIыгъэ продукциу рес­пуб­ли­кэм къыщашIырэми хэ­хъо. Мэкъумэщ хъыз­мэтшIапIэу хэтэрыкIхэм апылъхэм нэшэбэгоу фэбапIэхэм ащагъэтIысхьагъэм игъо хъугъэти, ащ ыуаси къызэтеуцуагъ.

Гъомылапхъэхэм анэмыкIырэ товарэу Iуагъэ­кIыхэрэм ауасэ изытети инфляцием иягъэ регъэ­кIы. Чъэпыогъу мазэм зэ­рэщытыгъэм егъэпша­гъэмэ, ар проценти 4,1-кIэ нахьыб, фэIо-фашIэхэм ягъэцэкIэн ылъэныкъокIэ инфляциер про­центи 2,3-рэ зэрэхъурэр.