ЯлэжьапкIэ фэдитIукIэ нахьыбэщт
«Единэ Россием» ифракциеу Къэралыгъо Думэм щыIэм ипащэу Сергей Неверовым Къэралыгъо советымрэ стратегическэ хэхъоныгъэмкIэ ыкIи лъэпкъ проектхэмкIэ Советымрэ зэхэсыгъоу зэдыряIагъэм илъэсыкIэ мэфэкIхэм Iоф зышIэщт медикхэм лэжьапкIэу къаратыщтым иIофыгъо къыщиIэтыгъ.
«Пандемием ыпкъ къикIыкIэ мэфэкI мафэхэм медицинэ IофышIэхэу ковиднэ госпитальхэм ащылэжьэщтхэм къахэхъощт. Тхьаумэфэ, мэфэкI мафэхэм зэрэлажьэхэрэм пае фэдитIукIэ нахьыбэу ахъщэ къаратынэу щытышъ, медицинэ IофышIэхэм икъоу лэжьапкIэ къаIэкIэхьаным лъыплъэгъэн фае», — къыIуагъ Сергей Неверовым.
МэфэкI мафэхэм Iоф зышIэхэрэм хэбзэгъэуцугъэм диштэу лэжьэпкIитIу зэраратын фаер Владимир Путинми агу къыгъэкIыжьыгъ. Ау коронавирусыр къызэутэлIагъэхэм яIазэрэ медицинэ IофышIэхэм социальнэ ахъщэ IэпыIэгъу ятыгъэным фэгъэхьыгъэу IофшIэн Кодексым зи итэп. «ИлъэсыкIэ мэфэкI мафэхэм Iоф зышIэщтхэм фэдитIукIэ нахьыбэу социальнэ ахъщэ IэпыIэгъу ятыгъэныр зафэу сэлъытэ», — къыIуагъ Владимир Путиным. Президентым къызэрэхигъэщыгъэмкIэ, «медицинэ IофышIэхэм вакцинэр зыхарагъалъхьэу рагъэжьэгъэ къодый, коронавирусыр ахэм къапыпкIэным ищынагъо джыри щыI». Къэралыгъом ипащэ министрэхэм я Кабинет хэтхэм пшъэрылъ афишIыгъ медицинэ IофышIэхэм фэдитIукIэ нахьыбэу социальнэ ахъщэ IэпыIэгъу ятыгъэным ехьылIэгъэ унашъор псынкIэу аштэнэу.