УищыкIагъэр къызэрэзыIэкIэбгъэхьащтыр

ЦIыфым IофшIэгъэ илъэсэу иIэр зыщыгъэнэфэгъэ тхылъэу электроннэ шIыкIэм тетэу гъэпсыгъэм (электронная трудовая книжка) IофшIапIэм зыщаштагъэри, иIэнатIи, нэмыкI чIыпIэ зыщыкIуагъэри, къызщыIукIыжьыгъэри, а зэхъокIыныгъэхэм лъапсэ афэхъугъэри итхагъэх. НахьыпэкIэ щыIэгъэ тхылъым щыгъэнэфэгъагъэр зэкIэ мыщи ит.

IофшIэгъэ илъэсхэм афэгъэхьыгъэ къэбарыр зищыкIагъэм УФ-м ПенсиехэмкIэ ифонд иинтернет нэкIубгъо щигъэпсыгъэ «унэе кабинетым» щызэригъэ­шIэн ылъэкIыщт. Ащ пае «Заказать справку о трудовой деятельности» зыфиIорэм ихьан фае. Къэралыгъо фэIо-фашIэхэм япортал ыгъэфедэми хъущт.

Къэбарыр зэрыт тхылъым (выписка) ПенсиехэмкIэ фондым иэлектроннэ IэпэкIадзэ иIэщт. Ар компьютерэу е телефонэу интернет нэкIубгъор къызщызэIуихыгъэм къытенэнэу ышIын ылъэкIыщт, электроннэ почтэмкIэ ыгъэхьынэу е къыдихыпэнэу амали иI.

ЦIыфым иIофшIэгъэ илъэсхэр зыщыгъэнэфэгъэ тхылъэу электроннэ шIыкIэм тетэу гъэпсыгъэм 2020-рэ илъэсым къыщегъэжьагъэу зэхъокIыныгъэу фэхъу­гъэхэр ары итхэгъэщтыр. НахьыпэкIэ хъугъэр «трудовой книжкэжъэу» иIагъэм къыдэнэжьыщт. Арышъ, электроннэ шIыкIэм техьажьыгъэхэм адрэ тхылъыр радзыжьы хъущтэп.

Мы шIыкIитIум язэу цIыфыр зыфаер 2020-рэ илъэ­сым итыгъэгъазэ и 31-м шIомыкIэу къыхихын фае.

Тхьамаф къэнагъэр

Федеральнэ хэбзэгъэуцугъэу «О национальной платежной системе» зыфиIорэм къызэрэщыдэлъытагъэмкIэ, пенсиеу къыфакIорэр банкым къызIэкIигъахьэхэрэм къихьащт 2021-рэ илъэсым ищылэ мазэ и 1-м къыщыублагъэу картэу «МИР» зыфиIорэр ары яахъщэ къызэрыхьащтыр. ­

Мы картэм Урысыер техьажьынэу зыригъэжьа­гъэр 2017-рэ илъэсыр ары. Пенсиер е нэмыкI социальнэ ахъщэ тынэу къыфакIорэр нэмыкI картэхэмкIэ (MasterCard, Visa, нэмыкIхэр) къызIэкIахьэхэрэм «МИР-м» техьажьынхэу мы мазэм и 31-м нэс пIа­лъэу яI.

Почтэм е нэмыкI организациеу пенсиехэр аIэкIэз­гъахьэхэрэм къызфихьыхэрэм мы шапхъэр анэсырэп.

Картэр бгъэпсыным пае банкым зыфэбгъэзэн фае. Ар зэрэзэблэпхъурэм имызакъоу, банкым иреквизитэу ахъщэр къызэрыхьэхэрэри зэхъокIыгъэ зыхъукIэ, ПенсиехэмкIэ фондыр ащ щыбгъэгъозэныр шIокI зимыIэ Iоф. Ащ пае лъэIу тхылъыр «унэе кабинетым» е къэралыгъо фэIо-фашIэхэм япортал ащыптын плъэ­кIыщт. ПенсиехэмкIэ фондым икъулыкъоу цIыфхэм Iоф адэзышIэрэм е МФЦ-м уякIуалIэми пIахыщт, ау ахэм пэшIорыгъэшъэу зябгъэтхын фае.

Нахьыпэрэм фэдэу, пенсиер къызэрэIэкIэхьащт шIыкIэр шъхьадж зэрэфаеу къыхихыни, къыхихыгъэр зэблихъужьыни фит. Ащ ищыкIэгъэ лъэIу тхылъыри фондым ичIыпIэ органэу зыпэблагъэм е МФЦ-м ащитын фит, интернетыр ыгъэфедэми хъущт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.