«Россети» къеты
ЗыIэкIагъахьэхэрэм ахэхъуагъ
2020-рэ илъэсыр къызихьагъэм къыщегъэжьагъэу Адыгэ электрическэ сетьхэм япхыгъэ къэкIуапIэхэм 1300-рэ джыри кIэу апашIагъ. ПстэумкIи зэхэубытагъэу ахэм аIэкIахьэрэр мегаватт 21-рэ мэхъу.
Электроэнергием икъэкIуапIэхэм апашIэным е зыпыгъэнагъэхэм ыкIуачIэ нахь ин афашIыным афэгъэхьыгъэу илъэсым къыкIоцI лъэIу тхылъ мини 2 фэдиз къатыгъ. Мегаватт 36-рэ зэкIэмкIи ахэм ящыкIагъэу хъурэр. Нахьыбэу къыкIэлъэIухэрэр бизнес цIыкIум ыкIи гурытым, туризмэм Iоф ащызышIэхэрэр ары.
Лъэпкъ проектхэм къащыдэлъытагъэу агъэуцугъэ социальнэ псэолъэ зэфэшъхьафыбэр, гущыIэм пае, кIэлэцIыкIу IыгъыпIэхэр, ФАП-хэр, еджапIэхэр Мыекъопэ, Кощхьэблэ, Джэджэ, Красногвардейскэ, Апшеронскэ, Шытхьэлэ районхэм ыкIи Мыекъуапэ ащагъэуцугъэхэу, ахэми электроэнергиер аратыгъ. Тыгъэм ыкIуачIэкIэ электричествэ къэзытырэ псэуалъэхэм ягъэуцун Шэуджэн районым щылъагъэкIуатэ.
Джащ фэдэу илъэсэу икIырэм пстэумкIи подстанцие 30 агъэуцугъ, электричествэм икIуапIэу километрэ 34,5-рэ агъэпсыгъ.
— Электроэнергиер зищыкIагъэхэр игъом ащ икъэкIуапIэхэм япхыгъэнхэр субъектым хэхъоныгъэхэр ышIынхэм, IофшIэпIэ чIыпIэхэр нахьыбэ хъунхэм, производствэр ежьэным, гъэсэныгъэм, медицинэм, нэмыкI социальнэ лъэныкъохэм яфэIо-фашIэхэр цIыфхэм икъоу аIэкIэхьанхэм афэIорышIэ. Ащ фэшI мы лъэныкъом лъэшэу тынаIэ тетэгъэты, — къыIуагъ «Россети Кубань» и Адыгэ шъолъыр къутамэ ипащэу Рустам Магдеевым. 
Хэбзэнчъэу агъэфедэщтыгъ
«Россети Кубань» зыфиIорэм и Адыгэ шъолъыр къутамэ электричествэр гъэбылъыгъэкIэ агъэфедэу 2020-рэ илъэсэу икIырэм гъогогъу 232-рэ ыгъэунэфыгъ. Хэбзэнчъэу ахэм киловатт миллиони 2,6-рэ агъэстыгъ. Юридическэ ыкIи физическэ лицэхэу ащ тетэу законыр зыукъуагъэхэм зэрарэу къэралыгъом сомэ миллиони 10,6-рэ рагъэшIыгъ.
Илъэсыр къызихьагъэм къыщыублагъэу электричествэр зытыгъущтыгъэу 115-мэ административнэ пшъэдэкIыжь арагъэхьыгъ. Зэрарыр къыпщыныжьынэу фэмыеу къахэкIыгъэхэм яIофхэм хьыкумыр ахэплъэнэу фагъэхьыгъ.
— Ежь-ежьырэу электричествэм икъэкIуапIэ зыпызгъанэрэм ыкIи ар къэзытырэ оборудованием хэIабэрэм псэупIэу зыдэсым, социальнэ псэуалъэу ащ дэтхэм электричествэр зэрэIэкIахьэрэр зэщегъакъо. Ащ имызакъоу, ежьыркIи ар щынагъоу щыт, — ыIуагъ Рустам Магдеевым.
Энергетикхэм шъугу къагъэкIыжьы, электроэнергиер зытыгъурэм законыр еукъо, арышъ, ащ административнэ е уголовнэ пшъэдэкIыжь ыхьыщт. Пэщэ IэнатIэм Iутэу ар зышIагъэм сомэ мин 30-м къыщегъэжьагъэу мин 80-м нэсэу тазыр рагъэтынэу ыкIи илъэситIум иIэнатIэ Iутын фимытэу шIыгъэнэу Кодексым къыщеIо. Юридическэ лицэхэм апае тазырэу сомэ мини 100-м къыщегъэжьагъэу 200-м нэсэу щыгъэнэфагъ.
Хъут Нэфсэт.