Гъогу занкIэм тырагъэуцожьых

Адыгэ Республикэм хэгъэгу кIоцI IофхэмкIэ и Министерствэ епхыгъэ зыныбжь имыкъугъэхэр охътэ гъэнэфагъэкIэ зыщаIыгъырэ гупчэм иIофышIэу, полицием имайорэу Карина Назаровар Мыекъуапэ игурыт еджапIэу N17-м ия 10-рэ полицейскэ класс ис кIэлэеджакIохэм аIукIагъ. Ведомствэм иподразделение иIофшIэн зыфэдэм, пшъэрылъэу иIэхэм кIэлэеджакIохэр ащигъэгъозагъэх.

Ащ къызэриIуагъэмкIэ, тыгъуагъэхэр ыкIи бзэджэшIэгъэ мыин зезыхьэгъэ Iэтахъохэр ары гупчэм чIэс­хэр. Ахэм дэгъоу афыщытых, гъогу занкIэм зэрэтырагъэхьажьыщтхэм пылъых. Iэтахъохэм янахьыбэм бзэджэшIагъэу зэрахьагъэм рыкIэгъожьхэу къаIо ыкIи тапэкIэ мыщ къычIэмыфэжьынхэу гупчэм иIофышIэхэр агъэгугъэх.

Министерствэм илIыкIо егъэджэн Iофтхьабзэр зэрэзэхащэрэм нахь игъэкIотыгъэу къыщыуцугъ. Ащ къызэриIуагъэмкIэ, Адыгэ республикэ гимназием икIэлэегъаджэхэм пэIудзыгъэ шIыкIэм тетэу гупчэм чIэс кIэлэеджакIохэр рагъаджэх.

Ащ нэмыкIэу мафэм тфэ агъашхэх, пхъэшъхьэ-мы­шъхьэхэр ыкIи псыIэшIухэр аратых.

Зыныбжь имыкъугъэхэм ящыкIэгъэщт уцхэр зы­чIэлъ хэушъхьафыкIыгъэ медицинэ кабинет агъэ­псыгъ. Джащ фэдэу Iэтахъохэм языгъэпсэфыгъо уахътэ зыщагъэ­кIощт спортзалыр ыкIи япсихикэ зыпкъ зыщырагъэуцо­жьын алъэкIыщт унэр гупчэм хэтых.

КIэухым майорэу Карина Назаровам кIэлэцIыкIу­хэм яупчIэхэм джэуапхэр къаритыжьыгъэх.

Гъогогъу 20-рэ агъэпцIагъэх

Мы аужырэ тхьамафэм пэIудзыгъэ шIыкIэм тетэу бзэджашIэхэм гъогогъу 20-рэ цIыфхэр агъэпцIагъэх. БзэджэшIэгъэ 15-р Мыекъуапэ, 5-р Тэхъутэмыкъое районым ащагъэунэфыгъэх. ЗэкIэмкIи зэрарэу ашIыгъэр сомэ миллиони 2-м кIахьэ.

Мыщ фэдэ нэшанэ зиIэ бзэджэшIагъэ къыдызэрахьагъэу Мыекъуапэ щыпсэурэ илъэс 52-рэ зы­ныбжь бзылъфыгъэм полицием иIофышIэхэм зафигъэзагъ. Мобильнэ телефоныр къызыфагъэфеди, гъэпцIакIохэм бзылъфыгъэм сомэ мин 50 шIуатыгъугъ.

Мы шIыкIэ дэдэмкIэ Мыекъуапэ щыпсэурэ хъулъфыгъэу илъэс 41-рэ зыныбжьыр агъэделагъ. Зэкъо­дзакIохэм телефон номер зэфэшъхьафыбэ къызыфагъэфедэзэ хъулъфыгъэм икартэ илъыгъэ сомэ мин 29-рэ рахыгъ.

Тэхъутэмыкъое районым щыпсэурэ бзылъфыгъэу илъэс 58-рэ зыныбжьыр бзэджашIэхэм агъэделагъ. Икартэ тет пчъагъэхэр гъэпцIакIохэм зареIом, ащ илъыгъэ сомэ мин 412-р ратыгъукIыгъ.

Джащ фэдэу блэкIыгъэ тхьамафэм зэкъодзэн бзэджэшIэгъэ ин дэдэ зэрахьагъэу полицием икъулыкъушIэхэм агъэунэфыгъ. Гъэсэныгъэ тедзэ рагъэгъотынэу агъэгугъи, Мыекъуапэ щыпсэрэ илъэс 44-рэ зыныбжь бзылъфыгъэм икартэ илъыгъэ сомэ мин 700 ратыгъукIыгъ.

ХэбзэухъумакIохэм мы бзэджэшIагъэхэмкIэ хэу­шъхьафыкIыгъэ Iофтхьабзэхэр зэрахьэх.

Мыщ фэдэ хъугъэ-шIагъэхэм цIыфхэр ащыухъумэгъэнхэм фэшI, ведомствэм икъулыкъушIэхэм цIыфхэм зафагъазэ сакъыныгъэ къызхагъэфэнэу. Сыд фэдэрэ ушъхьагъукIи шъумышIэрэ цIыфым цыхьэ фэшъумышI, шъуикартэ иномер, ащ тетхэгъэ пчъагъэхэр яшъумыIох.

ШъуцIэ, шъулъэкъуацIэ къыраIоми е шъуипаспорт итхэгъэ къэбархэм ащыгъуазэхэми, гъэпцIакIохэм цыхьэ афэшъумышI, шъуадэмыгущыIэу телефоныр жъугъэтIылъыжь.

Лъыплъэн IофшIэнхэр агъэлъэшых

Промышленнэ продукциер хэбзэнчъэу Адыгеим къыщезыгъэкIокIыхэрэм апэуцужьыгъэнымкIэ Комиссием изэхэсыгъо хэлэжьагъ АР-м хэгъэгу кIоцI IофхэмкIэ иминистрэ иIэнатIэ зыгъэцэкIэрэ Александр Евсеевыр.

Iофыгъо шъхьаIэу ащ зыщытегущыIагъэхэр къагъэорэ пкъыгъохэр хэбзэнчъэу къызэрэрагъэкIокIыхэрэм пэшIуекIогъэныр ары.

Iофтхьабзэр зэрищагъ АР-м и ЛIышъхьэу КъумпIыл Мурат. Видеоконференцие шIыкIэм тетэу рекIокIыгъэ Iофтхьабзэм хэлэжьагъэх АР-м хэгъэгу кIоцI IофхэмкIэ иминистрэ иIэнатIэ зыгъэцэкIэрэ Александр Евсеевыр, экономическэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ ведомствэм игъэIорышIапIэ ипащэ игуадзэу Кубэщыч Мурат.

ИлъэсыкIэ мэфэкIым ипэгъокIэу къагъэорэ пкъыгъохэр хэбзэнчъэу къызэрэрагъэкIокIыхэрэр анахь гумэкIыгъоу къэуцухэрэм ащыщ. Хэукъоныгъэхэр дэгъэзыжьыгъэнхэм фэшI тыгъэгъазэм и 20-м къыщегъэжьагъэу и 30-м нэс пэшIорыгъэшъ Iофтхьабзэу «Пиротехника» зыфиIорэр республикэм щырагъэкIокIы.

Полицием иполковникэу Кубэщыч Мурат къызэриIуагъэмкIэ, къагъэорэ пкъыгъохэр зыщэнхэ зылъэ­кIыщт закъохэр Iизын зыпылъ тхьапэр зиIэ хэушъхьафыкIыгъэ тучанхэр, щэпIэ чIыпIэхэр ары.

Мы илъэсми къагъэорэ пкъыгъохэр хэбзэнчъэу къызэрэрагъэкIокIырэм епхыгъэ пэшIорыгъэшъ Iоф­тхьабзэхэр зэрахьэх. Ахэм ахэлажьэх полицием иуча­стковэ уполномоченнэхэр ыкIи патруль-постовой къулыкъум иIофышIэхэр.

Адыгеим и ЛIышъхьэ министерствэм илIыкIохэм пшъэрылъ афишIыгъ урамхэм ыкIи общественнэ чIыпIэхэм кIэлэцIыкIухэм къагъэорэ пкъыгъохэр ащамыгъэфедэнхэм, машIор щынэгъончъэу щытыным лъыплъэнхэу.

Зылъыхъухэрэ нэбгырэ 15-р къаубытыгъ

АР-м хэгъэгу кIоцI IофхэмкIэ и Министерствэ изэфэхьысыжьхэмкIэ, 2020-рэ илъэсыр къызихьагъэм щыублагъэу хьыкумым ыкIи следствием зашIозыгъэбылъыщтыгъэ нэбгырэ 15 Адыгеим иполицие икъулыкъушIэхэм къаубытыгъэх. Ахэм ащыщэу 9-р федеральнэ лъыхъуным хэтыгъэх.

ГущыIэм пае, илъэс 30 зыныбжь хъулъфыгъэу Яблоновскэм щыпсэурэм наркотикыр хэбзэнчъэу къызэрэригъэкIокIырэм епхыгъэ бзэджэшIагъэ зэрихьагъэу зигъэбылъыщтыгъэ. Полицием иIофышIэхэм бзэджашIэр Тэхъутэмыкъое районым къыщаубытыгъ, ыпэкIи ащ хьапс телъыгъ. Мы район дэдэм къыщагъотыгъ мылъку бзэджэшIагъэ зезыхьагъэу федеральнэ лъыхъуным щыIэгъэ хъулъфыгъэр. Краснодар краим щыщ хъулъфыгъэм ыпэкIэ хьапс телъыгъ.

ШъунаIэ тешъотэгъадзэ, лъыхъуным щыIэхэм защыжъугъэгъозэнэу шъуфаемэ АР-м и МВД исайт инэкIубгъоу «Розыск» зыфиIорэм шъуихьан шъулъэ­кIыщт. Зылъыхъухэрэм якъэбар шъущыгъуазэу щытмэ полицием ителефон номерэу 02-м е (102-м) шъутео­ни макъэ яжъугъэIун шъулъэкIыщт.

Шапхъэхэр аукъох

Тэхъутэмыкъое районымкIэ дознанием иотдел икъулыкъушIэхэм мы районым щыщ илъэс 31-рэ зыныбжь водителым ылъэныкъокIэ уголовнэ Iоф къызэIуахыгъ. Къулыкъур ахьызэ гъогу-патрулым иIофышIэхэм поселкэу Яблоновскэм щыщ хъулъфыгъэр ешъуагъэу рулым Iусэу къаубытыгъ. Нэужым зэрагъэунэфыгъэмкIэ, мыщ ыпэкIи ар ешъуагъэу къагъэуцуи, пшъэдэкIыжь рагъэхьыгъагъ.

Мыщ ехьщыр уголовнэ Iоф полицием иотделэу Кощхьэблэ районым щыIэм къызэIуихыгъ. Гъогу-патруль къулыкъум иIофышIэхэм илъэс 28-рэ зыныбжь водителыр къызагъэуцум ар ешъуагъэу къычIэкIыгъ. Медицинэ уплъэкIунхэр ащ афишIыгъэхэп. Къулыкъу­шIэхэм зэрагъэунэфыгъэмкIэ, ыпэкIи ешъуагъэу къагъуцуи, иправэ Iахыгъэу щытыгъ нахь мышIэми, хъулъ­фыгъэр ешуагъэу рулым Iусыгъ.

Мыщ фэдэ щысэу бэ къэпхьын плъэкIыщтыр.

Ешъуагъу къагъэуцугъэ водительхэм ямашинэхэр аIахыгъэх ыкIи уголовнэ Iофхэр къафызэIуахыгъэх .

АР-м хэгъэгу кIоцI IофхэмкIэ и Министерствэ шъугу къегъэкIыжьы, Уголовнэ кодексым къызэригъэнафэрэмкIэ, ятIуанэу ешъуагъэу къагъэуцугъэ водителым илъэси 2-м нэс хьапс тыралъхьан алъэкIыщт.

НэкIубгъор зыгъэхьазырыгъэр КIАРЭ Фатим.