НыбжьыкIэхэм тагъэгугъэ
Адыгэ Республикэм дзюдомкIэ изэнэкъокъу спорт еджапIэу Кобл Якъубэ ыцIэ зыхьырэм щыкIуагъ.
Илъэс 21-м нэс зыныбжь бэнакIохэр алырэгъум щызэIукIагъэх. Яонтэгъугъэхэм ялъытыгъэу апэрэ чIыпIэхэр къыдэзыхыгъэхэм шъуащытэгъэгъуазэ.
Шъынэхъо СултIан, кг 55-рэ, тренерыр Мерэм Саид. Тыгъужъ ТIахьир, кг 60, Лъэцэр Дамир, кг 60, Георгий Парфиров, кг 81-рэ, нэбгырищыри Адыгэ Республикэм изаслуженнэ тренерэу Хьакурынэ Дамир егъасэх. Даур Астемир, кг 73-рэ, тренерыр КIубэ Хьамед, Ваган Григорян, кг 90-рэ, тренерыр Роман Оробцов. Килограмми 100-м нэс къэзыщэчыхэрэм ыкIи зэфэшъхьаф онтэгъугъэ зиIэхэм якупхэм Бэгъ Аслъан апэрэ чIыпIэр къащыдихыгъ. БэнакIор Адыгэ Республикэм изаслуженнэ тренерэу Беданыкъо Рэмэзан егъасэ.
ЯтIонэрэ чIыпIэхэр Шыбзыхъо Алый, ЦIыкIушъо Асхьад, Мерэм Нарт, Андрей Сабининым, Пщыгъонэ Айтэч, Гъыщ Нарт, нэмыкIхэм къыдахыгъэх.
Ящэнэрэ чIыпIэхэр афагъэшъошагъэх Эдуард Мирошниковым, Кобл Азэмат, Юрий Балоян, Ордэн Батыр, Руслан Мозговоим, Григорий Саакян, Николай Николаевым, УдыкIэко Бислъан, фэшъхьафхэм.
— ТибэнэкIо ныбжьыкIэхэм акIуачIэ, якъулай зэрапсыхьэрэр нахьышIоу зэдгъэшIэным фэшI, яIэпэIэсэныгъэ хагъэхъонымкIэ амалыкIэу щыIэхэм тызэдягупшысэн тимурадэу республикэм изэнэкъокъу зэхэтщагъ, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим дзюдомкIэ ихэшыпыкIыгъэ командэ итренер шъхьаIэу Бастэ Сэлымэ. — ТиныбжьыкIэхэм тагъэгугъэ, бэнэкIо дэгъухэр къахэкIыщтхэу тэлъытэ.
ХагъэунэфыкIырэ чIыпIэхэр къыдэзыхыгъэхэм афэгушIуагъэх, шIухьафтынхэр аратыжьыгъэх.
Сурэтым итхэр: зэнэкъокъум гъэхъагъэ щызышIыгъэхэр.