Испанием ифутбол командэу «Барселонэм» щешIэрэ Лионель Месси дунэе рекорд ыгъэуцугъ.

Зы командэм щешIэзэ, къэлапчъэм Iэгуаор зэкIэми анахьыбэрэ дэзыдзагъэу зыцIэ къыраIощтыгъэр Бразилием щыщэу дунаим щызэлъашIэрэ Пеле. Бразилием икомандэу «Сантосым» хэтэу Пеле гъогогъу 643-рэ хъагъэм Iэгуаор дидзагъ.

Лионель Месси Аргентинэм къыщы­хъугъ, илъэс 16 хъугъэу «Барселонэм» иешIакIу. Испанием щыкIорэ зэ­нэкъокъум хэлажьэзэ, дунаим ифутбол ешIэкIо анахь дэгъоу, къэлапчъэм Iэгуаор анахьыбэрэ дидзагъэу пчъа-гъэрэ ыцIэ къыраIуагъ.

«Барселонэр» тыгъэгъазэм и 22-м «Вальядолид» зыдешIэм, 3:0-у зэIукIэгъур аухыгъ. Л. Месси къэлапчъэм Iэгуаор зэ дидзи, дунэе рекорд ыгъэуцугъ.

Пеле «Сантос» зыхэкIыжьыгъэр бэшIагъэ. Месси «Барселонэм» хэт, къэ­лапчъэм Iэгуаор дидзэнэу амалышIухэр иIэх, илъэс 33-рэ ыныбжь, унэгъо дахэ иI.

— КъэкIощт илъэсым «Барселонэм» сыщешIэщтми сшIэрэп, — къы­Iуагъ Л. Месси. — Клубым хэдзынхэр щыкIощтых. Пащэу тиIэщтым, «Барселонэм» мурадэу зыфишIыщтхэм ялъытыгъэу сэри унашъохэр исхъухьащтых.

Хэта Л. Месси идунэе рекорд ­езы­гъэхъун зылъэкIыщтыр? Ар упчIэ ­шъхьаф. Тэ къыхэдгъэщы тшIоигъор дунэе спортым хэхъоныгъэ фэзышIыгъэ Л. Месси футболым лъэужэу къыщи­гъэнагъэр зыми зэрэхэмыкIокIэщтыр, ешIэкIо мин пчъагъэхэм щысэшIу зэрафэхъурэр ары. Опсэу, Лионель! Тхьэм бэгъашIэ, насыпышIо уешI. О уигъэхъа­гъэхэм дунаир арэгушхо.