Зэрэдунаеу гумэкIыгъо къыфэзыхьыгъэ узым тиадыгэ чIы­налъи къы­щиухьагъэп. Нахьыбэмэ ашIошъ мыхъузэ, яунагъомэ къарыхьэ­пагъ, къин зылъэгъоу зыIотэжьыгъи, зидунай зыхъожьыгъи къахэкIыгъ.

Апэрэ мафэм щегъэ­жьагъэу гуфэбагъэрэ гу­кIэгъурэ сымаджэмэ афыряIэу медицинэм иIофы­шIэхэм лIыхъужъыныгъэу зэрахьэрэм зэ тежъугъэгупшыс. Ежьхэр зэрэсы­мэджэнхэ алъэкIыщтми емыгупшысэхэу яIофшIэн агъэцакIэ ыкIи ящытхъу пIоныр къалэжьыгъэу ате­фэ. Адыгеим ищытхъуцIэ­хэр къызфагъэшъоша­гъэхэм тафэгушIо, яшIэны­гъэрэ яопытрэ зи­щыкIэгъэ цIыфмэ тапэкIэ афагъэшIушIэнэу тащэгугъы.

Сигуапэу къахэзгъэщымэ сшIоигъу ВэкъэшIэ Аслъан иунагъо. Аслъанрэ ишъхьэгъусэу Светэрэ къыхахыгъэ сэнэхьатым фэшъыпкъэхэу, агу етыгъэу, IэпэIэсэныгъэшхорэ гукIэгъушхорэ ахэлъэу рэлажьэх. Нэбгырэ тхьа­пшымэ ишIуагъэ аригъэ­кIын, япсауныгъэ зэтыригъэуцожьын ылъэкIыгъа Аслъан! Мыщ фэдэ зэшъхьэгъусэхэм ясэнэ­хьат гъогу ясабыйхэри зэ­рэрагъэкIуагъэхэр бгъэ­шIэгъонэу щытэп. Зынахь лъапIэ къэмыхъугъэу цIыфым ипсауныгъэ къэу­ухъу­мэн, ащ Iоф дэпшIэныр къин, ау къыпщыгугъырэр уигущыIэ дахэрэ уишIэныгъэрэкIэ бгъэрэзэшъуныр уиамал къыхьыныр ­осэнчъ. ПшъэдэкIы­жьышхоу уапа­шъхьэ къиуцорэр тэрэзэу зэшIопхыныр насыпыгъ. А насып гъогум тетых нымрэ тым­рэ ялъагъо рыкIохэрэ Саи­дэрэ Рустемрэ. ИкIыгъэ илъэсым иврач Iэпэ­Iасэу къыхагъэщыгъагъ Саидэ, джы «Адыгэ Рес­публикэм псауныгъэр къэу­хъумэгъэнымкIэ изаслуженнэ IофышI» зыфи­Iорэ щытхъуцIэр къызфагъэшъошагъэхэм Рустем ащыщ. Ишъхьэгъусэу Рузанэ къызхэхьэгъэ уна­гъом дыригъаштэу кардио­лог Iазэу республикэм щалъытэ.

ЯунагъокIэ къи­хьащт илъэсыр мафэ афэ­хъунэу, гумэкIыгъо ямыIэу, гъэшIэ кIыхьэ хъунхэу сафэлъаIо.

Анзорыкъо Свет. Лъэпкъ просвещением иотличник, АР-м Лъэпкъ гъэсэныгъэмкIэ изаслуженнэ IофышI.