ЫпкIэ хэмылъэу
Адыгеим имедицинэ IофышIэхэу коронавирусыкIэм пэшIуекIогъэным хэлажьэхэрэм ыпкIэ амытэу таксикIэ зекIонхэу амал яIэ хъугъэ.
АР-м и ЛIышъхьэу КъумпIыл Мурат пшъэрылъ къафишIыгъэу АР-м цифрэ хэхъоныгъэмкIэ и Министерствэ «Яндекс.Такси» зыфиIорэм Мыекъопэ къэлэ поликлиникэм итерапевт нэбгырэ 35-рэ зэрищэнэу зэзэгъыныгъэ дишIыгъ.
Таксихэм ахэр пчэдыжьрэ IофшIэпIэ чIыпIэхэм къащэщтых, пчыхьэм ащэжьыщтых. Зэпахырэ узым зызэриушъомбгъурэм ыпкъ къикIыкIэ IофшIэнышхо зытегъэуагъэ хъугъэ врачхэм апае ар джыри зы IэпыIэгъу. Ащ ыпэкIэ псауныгъэм икъэухъумэнкIэ учреждениехэм агъэфедэнхэу хэбзэ къулыкъухэм автомашинэхэр аратыгъэх. Мы Iофтхьабзэм волонтерхэри, Урысые народнэ фронтыри хэлажьэх.