Урысыем и Президентэу Владимир Путиным Урысые Федерацием и Къэралыгъо советрэ стратегическэ хэхъоныгъэмкIэ ыкIи лъэпкъ про­ектхэмкIэ Советэу Урысые Федерацием и Президент дэжь щы­зэхэщагъэмрэ язэхэсыгъо зэрищагъ.

Урысые Федерацием и Президент и Указэу N 474-р зытетэу «2030-рэ илъэсым нэс Урысые Федерацием хэхъо­ныгъэ зэришIыщтым ехьылIагъ» зыфиIорэр зэрагъэцакIэрэм Iофтхьабзэр фэгъэхьыгъагъ.

Зэхэсыгъом хэлэжьагъэх Уры­сые Федерацием и Пра­вительствэ, Урысые Федера­цием и Федеральнэ ЗэIукIэ ахэтхэр, Урысые Федерацием и Къэралыгъо Думэ ифракциехэм, федеральнэ ведомствэхэм, шъолъырхэм япащэхэр. Адыгеим ыцIэкIэ республикэм и ЛIы­шъхьэу КъумпIыл Мурат видео­зэпхыныгъэ шIыкIэм тетэу Iоф­тхьабзэм хэлэжьагъ.

Зэхэсыгъор къызэIуихызэ, Урысыем и Президентэу Владимир Путиным зэрэхигъэунэфыкIыгъэмкIэ, Урысые Феде­рацием и Къэралыгъо совет статусыкIэ иIэ хъугъэ, Феде­рацием ишъолъырхэр, муниципалитетхэр унашъохэм яштэн нахь чанэу къыхэгъэлэжьэгъэнхэмкIэ иполномочиехэм къа­хэ­хъуагъ. Хэгъэгум ипащэ зэ­хэ­сыгъом хэлажьэхэрэм анаIэ тыраригъэдзагъ пшъэрылъэу яIэхэр шIуагъэ къытэу, агъэ­нэ­фэгъэ пIалъэхэр къэмысыхэзэ зэрэзэшIуахын фаем.

«Зэпыу имыIэу ыпэкIэ лъыкIо­тэным тихэгъэгукIэ стратегическэ мэхьанэшхо иI. Демогра­фическэ, геополитическэ, эконо­мическэ, технологическэ Iофхэм язытет елъытыгъэу тыкъызэтеуцо хъущтэп», — къыIуагъ Владимир Путиным.

Урысыем и Президент и Указ тегъэпсыхьагъэу Iофэу ашIагъэм къытегущыIагъэх Урысые Федерацием и Правительствэ и Тхьаматэу Михаил Мишустиныр, Урысые Федерацием ивице-премьерхэр, хэгъэгум ишъолъырхэм ялIышъхьэхэу лъэпкъ проектхэм япхырыщынкIэ Урысые Федерацием и Къэралыгъо совет икупхэм япащэу щытхэр. Зэхэсыгъом зэрэщыхагъэунэфыкIыгъэмкIэ, Урысыем и Президент пшъэ­рылъ къызэрэфишIыгъэм тетэу Урысые Федерацием и Правительствэ план зыкIэу лъэпкъ проектхэмрэ къэралыгъо программэхэмрэ зэзыпхыщтыр къыгъэхьазырыгъ.

Владимир Путиным псауныгъэм икъэухъумэн, Iэзэгъу уц­хэм яIэкIэгъэхьан, социальнэ ахъщэ IэпыIэгъухэр ятыгъэным, цIыфхэм псэукIэ амалэу яIэхэр нахьышIу шIыгъэным, гъогу­шIыным япхыгъэ Iофыгъохэм зэхэсыгъом хэлажьэхэрэм анаIэ тыраригъэдзагъ.

Урысые Федерацием и Къэралыгъо совет хэтхэм Урысые Федерацием ишъолъырхэм ягъэцэкIэкIо хэбзэ къулыкъу­хэмрэ ахэм апшъэрэ IэнатIэхэр ащызыIыгъхэмрэ яIофшIэн уасэ зэрэфашIырэм епхыгъэ пред­ложениехэм атегущыIагъэх. Зэ­хэсыгъом къыщаIэтыгъэ зигъо IофыгъохэмкIэ «Единэ Россием», КПРФ-м, «Справедливая Россия» зыфиIорэм, ЛДПР-м яфракциехэу Къэралыгъо Думэм щыряIэхэм япащэхэр къэ­гущы­Iагъэх.

Адыгеим и ЛIышъхьэу КъумпIыл Мурат къэбар жъугъэм иамалхэм яIофышIэхэм адэгущыIэзэ зэрэхигъэунэфыкIы­гъэмкIэ, шъолъырхэм хэхъоныгъэ ашIыным пае федеральнэ гупчэм зэдэлэжьэныгъэ пытэ дыряIэн, къэралыгъо программэхэр, лъэпкъ, федеральнэ проектхэр агъэцэкIэнхэ фае.

«Урысыем и Президентэу Владимир Путиным 2030-рэ илъэсым нэс хэгъэгум хэхъоны­гъэ зэришIыщт лъэныкъуакIэхэр мыгъэ къыгъэнэфагъэх. Пандемием зызэриушъомбгъугъэм емылъытыгъэу пIэлъэ кIы­хьэхэм ателъытэгъэ стратегическэ гу­хэлъхэр зытетым тетэу къэнэ­жьы­гъэх. Къэралыгъом ипащэ къыгъэуцугъэ пшъэрылъхэм та­дэмыхэу тапэкIи Iоф тшIэнэу тыхьазыр. Лъэпкъ проектхэр Адыгеим зэрэщагъэцакIэхэрэм цIыфхэм ящыIэкIэ-псэукIэ зыкъызэрэрагъэIэтыгъэм нэмыкIэу, коронавирусым республикэм иэкономики, исоциальнэ лъэныкъуи зэрарэу къафихьыгъэр нахь къырагъэIыхын алъэкIыгъ. Къэралыгъо программэхэмрэ социальнэ-экономикэ хэхъоныгъэмкIэ унэе программэмрэ адиштэу Адыгеим пшъэрылъы­шхохэр зэшIуихынхэу ыпэкIэ къэт, хабзэм ифедеральнэ къу­лы­къухэм гъусэныгъэ пытэ ады­тиIэу джыдэдэми тэлажьэ», — хигъэунэфыкIыгъ КъумпIыл Мурат.

Шъугу къэтэгъэкIыжьы ­лъэпкъ проектхэм адиштэу 2020-рэ илъэсым Адыгеим сомэ миллиарди 4,4-рэ къызэрэфатIупщыгъэр. Псауныгъэм икъэухъу­мэнкIэ, гъэсэныгъэмкIэ, демо­гра­фиемкIэ, культурэмкIэ, спор­тымкIэ, экологиемкIэ, бизнес цIыкIумрэ гурытымрэ IэпыIэгъу ягъэгъотыгъэнымкIэ, псэолъэшIынымкIэ, гъогушIынымкIэ ахэр къызыфагъэфедагъэх. Панде­мием зыкъызэриштагъэм емы­лъытыгъэу республикэм социальнэ-экономикэ процессхэр къыщызэтеуцуагъэхэп. Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэмкIэ мыгъэ Адыгеим Урысые Федерацием и Правительствэ идиплом къыфагъэшъошагъ.

Адыгэ Республикэм и ЛIышъхьэ ипресс-къулыкъу