Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат АР-м и Къэралыгъо Совет — Ха­сэм ипартийнэ фракцие идепутатхэм тыгъуасэ зэдэгущыIэгъоу ади­шIыгъэр зыфэгъэхьыгъагъэр медицинэм иIофышIэхэм ыкIи цIыф­хэм, псауныгъэр къэухъумэгъэным иучреждениехэм IэпыIэгъу афэхъу­гъэ­нымкIэ парламентариехэм яIофшIэн зэрэзэхащэрэр ары.

Эпидемиологием ылъэны­къо­кIэ Iофхэм язытет зыщы­къин лъэхъаным врачхэм атегъэуагъэр нахь макIэ шIыгъэным, цIыфхэм яIэзэнхэм анаIэ тырагъэтыным мэхьанэшхо зэриIэр КъумпIыл Мурат хигъэунэ­фыкIыгъ. Коронавирусыр къызпы­хьагъэхэм Iэзэгъу уцхэр аIэ­кIэгъэхьэгъэнхэм, мы узыр зи­Iэхэм медикхэр алъыIэсынхэм­кIэ транспорт щыIэным, ам­бу­латорнэ сымаджэхэр ауплъэ­кIунхэм афэшI медицинэ учреж­дением къещэлIэгъэнхэм, врач­хэм ыкIи волонтерхэм шхы­ныгъо стыр арагъэгъотыным ана­хьэу пылъынхэу республикэм ипащэ къариIуагъ.

— Пандемиер къызежьагъэм щыублагъэу единороссхэм зэри­фэшъуашэу зыкъагъэлъэгъуагъ, мы IофшIэным псынкIэу хэщагъэ хъугъэх. Мы мазэхэм «Единэ Россием» ифракциеу АР-м и Къэралыгъо Совет — Хасэм щыIэм гъогогъуищрэ ахъщэ IэпыIэгъу къыхигъэкIыгъ. Ащ да­кIоу яунэе мылъку халъхьэзэ партийцэхэр медицинэм иучреждениехэм IэпыIэгъу афэхъу­гъэх, ИВЛ аппаратхэр къащэфыгъэх, цIыфхэм гъомылапхъэ­хэр ыкIи Iэзэгъу уцхэр аIэ­кIагъэ­хьагъэх, нэмыкIыбэ зэшIуахыгъ. АщкIэ пстэуми инэу сышъуфэраз, ау ащ дакIоу Iоф­шIэныр джыри нахь дгъэлъэшын фае, — къыIуагъ респуб­ликэм ипащэ.