Зэпахырэ узэу дунаир зэлъызыкIугъэм ыпкъ къикIыкIэ, мы илъэсыр къинэу кIуагъэ. Ащ пэшIуекIорэ IофшIэнхэр республикэм ихэбзэ гъэцэкIэкIо къулыкъухэмкIэ пстэумэ апэ къиуцуагъэх.

Арэу щытми, республикэм хэхъоныгъэ езгъэшIыщт лъэныкъохэмкIи яIофшIэн къызэты­рагъэуцуагъэп. ГущыIэм пае, цIыфхэм ящыIакIэ нахьышIу шIыгъэным фэIорышIэрэ лъэпкъ проектхэм къадыхэлъытагъэу мыгъэ агъэнэфэгъагъэхэр зэшIохыгъэ хъугъэх.

Проект 12-м щыщэу 11-р ары Адыгеим щыпхыращырэр. Ахэр гъэцэкIэгъэнхэм пае шъолъыр проект 50-у аштагъэм 2020-рэ илъэсым сомэ миллиарди 4,2-рэ пэIуагъэхьагъ. Ащ щыщэу миллиарди 3,6-р федеральнэ ахъщ, сомэ миллион 558-р республикэ бюджетым къыхэхыгъ, сомэ миллион 37-р муниципальнэ образованиехэм хагъэхъуагъ.

Лъэпкъ проектэу «Псауныгъ» зыфиIорэм къыдыхэлъытагъэу Адыгэ республикэ онкологическэ диспансерым, Адыгэ рес­публикэ ыкIи Мыекъопэ къэлэ сымэджэщхэм, кIэлэцIыкIухэм апае диагностическэ гупчэм, ахэм зыщяIазэхэрэ сымэджэщым, поликлиникэхэм ящыкIэгъэ оборудованиер, техникэр афащэфыгъ. Джащ фэдэу мы илъэ­сым ФАП 23-рэ кIэу ашIыгъ е рагъэжьагъ. ГущыIэм пае, мы проектым ишIуагъэкIэ Теуцожь районым изакъоу фельдшермамыку IэзапIэу 9 щашIы, сомэ миллион 33,3-рэ ахэм апэIу­хьагъ. Мыекъопэ районым 5 щагъэуцугъ, сомэ миллион 18,8-рэ ахэм атефагъ. Адрэ муниципальнэ образованиехэри мыщ хэны фэхъугъэхэп.

Лъэпкъ проектэу «Псауныгъ» зыфиIорэм къыдыхэлъытагъэу мыгъэ зэшIуахыгъэхэм сомэ миллион 800-м ехъу апэIухьагъ.

«Гъэсэныгъ» зыфиIорэ проектым къыдыхэлъытагъэхэм апае сомэ миллион 866-рэ агъэнэфэгъагъ. АщкIэ Мые­къуапэрэ ащ хахьэрэ станицэу Ханскэмрэ ащырагъэжьэгъэ еджапIэхэр аухыжьых, IофшIэнхэр гъунэм рафылIагъэх, еджэпIибгъумэ спортзалхэр аща­гъэ­псыгъэх, нэмыкIэу кIэлэеджа­кIохэм хэхъоныгъэхэр ашIынхэм фытегъэпсыхьэгъэ IофшIэн зэ­фэ­шъхьафыбэ зэшIуахыгъ.

«Малое и среднее пред­принимательство и поддержка индивидуальной предпринимательской инициативы» зыфиIорэм ипхырыщын сомэ миллион 267-рэ мы илъэсым пэIухьагъ. Ащ къыхэхыгъэу «Мой бизнес» зыфиIорэ Гупчэм, экспортым IэпыIэгъу егъэгъоты­гъэнымкIэ Гупчэм пшъэрылъэу яIэхэм ягъэцэкIэн пае ахъщэхэр афагъэкIуагъэх, езгъэжьэгъэкIэ фермерхэм грантхэр, субсидиехэр аратыгъэх.

Лъэпкъ проектэу «Культу­рэм» къыдыхэлъытагъэу культу­рэм и Уни 5 республикэм мы илъэсым щагъэкIэжьыгъ, кIэу зы ашIы. Джащ фэдэу культурэм ылъэныкъокIэ гъэсэныгъэ защарагъэгъотырэ учреждениехэм, тхылъеджапIэхэм ящыкIагъэхэр афащэфыгъэх. ГущыIэм пае, проектым къыдыхэлъытагъэу Джэджэ ыкIи Кощхьэблэ районхэм ятхылъеджапIэхэр агъэкIэжьыхи, лъэхъаным ди­штэу зэтырагъэпсыхьагъэх.

Мыгъэ проектым ипхырыщын сомэ миллиони 106-рэ пэ­Iуагъэхьагъ.

«Щынэгъончъэ ыкIи шэп­хъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу 2020-рэ илъэ­сым зэшIуахыщтхэм сомэ миллион 637-рэ апэIухьагъ. АщкIэ автомобильнэ гъогу километрэ 49-рэ агъэцэкIэжьыгъ, агъэкIэ­жьыгъ, видеокамерэ 50-м ехъу агъэуцугъ.

«Демография» зыфиIорэ про­ектым игъэцэкIэн пэIухьанэу мы илъэсымкIэ сомэ миллиардрэ миллион 237-рэ агъэ­нэфэгъагъ. Мыщ къыдыхэлъытагъэу Адыгеим икъэлэ шъхьаIэ зы кIэлэцIыкIу IыгъыпIэ щау­хыжьыгъ, щы рагъэжьагъ. Джащ фэдэу спорткомплексэу мыл зытелъ площадкэ зиIэр аухыгъ, джыри комплекси 4 ашIы.

Мы проектым ипхырыщын пае кIэлэцIыкIу къызэрыхъухьэгъэ унагъохэм IэпыIэгъу ятыгъэ­ным фытегъэпсыхьэгъэ шъо­лъыр проектэу аштагъэм къыдыхэ­лъытагъэу ягъот макIэу унэгъо 3407-мэ ахъщэкIэ адеIагъэх.

Лъэпкъ проектэу «ПсэупIэр ыкIи къэлэ щыIакIэр» зыфи­Iорэм къыдыхэлъытагъэу зэшIуа­хыщтхэм сомэ миллиони 176-рэ пстэумкIи апэIухьагъ. Мыгъэ ащкIэ общественнэ чIыпIэ 14, фэтэрыбэу зэхэт унэхэм ящагу 34-рэ зэтырагъэ­псы­хьажьыгъ.

Адыгэкъалэ исаугъэт зэхэтэу «ТекIоныгъ» зыфиIорэм къызэлъиубытырэ чIыпIэри мы проектым къыдыхэлъытагъэу зэтырагъэпсыхьагъ.

«Экология» зыфиIорэ ­лъэпкъ проектым игъэцэкIэн сомэ миллион 98-рэ пэIухьащт. Ащ ипхырыщын пае аштэгъэ шъолъыр проектэу «Чистая вода» зыфи­Iорэм къыдыхэлъытагъэу къуа­джэу Кощхьаблэрэ селоу Красногвардейскэмрэ ащыпсэухэрэм псы къабзэ аIэкIэзгъэ­хьащт псэуалъэхэр ащашIых. КъэкIощт 2021-рэ илъэсым ащ фэдэ псэо­лъэ 15 муниципальнэ образовании 5-мэ ащагъэцэкIэжьынэу агъэнэфагъ.

Мы лъэпкъ проектым игъэцэкIэн пае аштэгъэ шъолъыр проектэу «Мэзхэр къэгъэнэ­жьыгъэнхэр» зыфиIорэм къыдыхэлъытагъэу мэзым машIом зыкъыщиштэмэ ащ зэребэныщтхэм ыкIи чъыгхэм ягъэтIыс­хьан ящыкIэгъэ техникэ зэ­фэшъхьафхэр ащэфыгъэх, мэз хъызмэт IофшIэнхэр зэшIуахыгъэх.

Пыдзэфэ пытэхэм узэрадэзекIощтым исистемэ гъэпсы­гъэным фэгъэхьыгъэ шъолъыр программэм къыдыхэлъытагъэу, хэкIым идэщын фэгъэзэгъэ шъолъыр операторым иIофшIэн пэIухьанэу сомэ миллион 30 федеральнэ бюджетым къыхэ­хыгъэу къатIупщыгъ.

Лъэпкъ проектэу «Цифровая экономика» зыфиIорэм къыдыхэлъытагъэу Адыгеим щыпхыращыгъэхэм сомэ миллиони 4,3-рэ, «Международная коопе­рация и экспорт» зыфиIорэм игъэцэкIэн сомэ миллион 27-рэ апэIухьагъ.

ХЪУТ Нэфсэт.