Урысыем и Президентэу Владимир Путиным пшъэрылъ къызэрэфи­шIыгъэм тетэу Адыгеим и ЛIышъхьэу КъумпIыл Мурат тыгъуасэ видео­конференцие шIыкIэм тетэу цIыфхэм яупчIэхэм Урысыем и Пре­зи­дент иприемнэ джэуап къащыритыжьыгъ.

Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ РеспубликэмкIэ ифедеральнэ инспекторэу Владимир Маргасовыр Iофтхьабзэм хэлэжьагъ.

ЦIыфхэр зыгъэгумэкIыщтыгъэ Iофыгъохэр анахьэу зы­фэгъэ­хьыгъагъэхэр гъогу инфраструктурэр зэтегъэпсы­хьэгъэныр, къоджэ еджапIэм Интернетыр нахьышIоу къыщызфагъэфедэн алъэкIыныр, Мыекъуапэ иавтомобиль гъогухэм ащыщ гъэкIэжьыгъэныр ары.

Къутырэу Гавердовскэм дэс бзылъфыгъэр псэупIэм къе­кIолIэрэ гъогум ыбгъу остыгъэ­хэр щыгъэуцугъэнхэм къыкIэлъэIугъ. Адыгэ Республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевым къызэриIуагъэмкIэ, мы гъогу Iахьыр зыфэгъэзагъэр ГъэIорышIапIэу «Адыгеяавтодорыр» ары. Гъо­-гум километрэ 1,4-рэ фэдиз икIыхьагъ. Адыгеим и ЛIышъхьэ министерствэм ипащэрэ Мые­къуапэ имэрэу Андрей Гетмановымрэ пшъэрылъ афишIыгъ мы Iофыгъом дэлэжьэнхэу. 2021-рэ илъэсым ичъэпыогъу нэс ар зэшIуахын фае.

Шэуджэн районымкIэ къутырэу Чернышовым дэт гурыт еджапIэу N 8-м информатик­эмкIэ икIэлэегъаджэ Адыгеим и ЛIышъхьэ зыкъыфигъэзагъ, Интернетым яеджапIэ нахьышIоу Iоф щишIэным епхыгъэ Iофыгъор ащ къыIэтыгъ. Адыгэ Республикэм гъэсэныгъэмрэ шIэныгъэмрэкIэ иминистрэ иапэ­рэ гуадзэу Евгений Лебедевым къызэриIуагъэмкIэ, федеральнэ проектэу «Информационная инфраструктура» зыфиIоу 2019 — 2021-рэ илъэсхэм ателъытагъэм диштэу компаниеу «Рос­телекомыр» ары Интернетым зыпышIэгъэным фэгъэзагъэр. Республикэм и ЛIышъхьэ пшъэ­рылъ афишIыгъ 2021-рэ илъэсым иапэрэ квартал зигугъу къэтшIыгъэ еджапIэм ащкIэ Iоф­шIэнхэр щаухынхэу. Джащ фэдэу КъумпIыл Мурат Адыгэ Рес­публикэм цифрэ, информационнэ, телекоммуникационнэ технологиехэмкIэ иминистрэу Шыу Заурбек пшъэрылъ фишIыгъ мы Iофыгъом изэшIохын къыхэлэжьэнэу.

Автомобиль гъогум игъэцэ­кIэжьын епхыгъэуи Адыгеим и ЛIышъхьэ зыкъыфагъэзагъ. Мыекъуапэ щыщ бзылъфыгъэр урамэу Заводскоим къыще­жьагъэу урамэу Желез­нодо­рожнэм нэс урамэу Курганнэр зэ­тегъэпсыхьажьыгъэнэу къэлъэIуагъ. А гъогум метрэ 700 фэдиз икIыхьагъ. Мые­къуапэ имэр къызэриIуа­гъэмкIэ, а гъо­гу Iахьым игъэкIэ­жьынкIэ проектым икъыхэхын джыдэдэм Iоф дашIэ. Мылъкур гъогухэмкIэ Фондым къыхагъэ­кIыщт.

«ГъогушIынымкIэ мэхьанэшхо зиIэ унашъохэр федеральнэ гупчэм ештэх. Гъогухэм яшIын­кIэ ыкIи ягъэкIэжьынкIэ планхэр тэгъэцакIэх, 2022-рэ, 2023-рэ илъэсхэм IофшIэнэу къытпыщылъхэр икъоу тшIэн фае», — хигъэунэфыкIыгъ КъумпIыл Мурат ведомствэхэм япащэхэм адэгущыIэзэ.

Республикэм и ЛIышъхьэ лъэпкъ проектхэмрэ федеральнэ программэхэмрэ къа­тегущы­Iэзэ, къалэхэмрэ къуа­джэхэмрэ адэсхэм зэфэдэ амалхэр яIэн зэрэфаер хигъэу­нэфыкIыгъ. Со­циальнэ лъэныкъоми, инфраструктурэ псэуа­лъэхэми, гъэ­сэныгъэми ар афэ­гъэхьыгъ.

Республикэм ипащэ хабзэм игъэцэкIэкIо, имуниципальнэ къулыкъухэм ялIыкIохэм пшъэ­рылъ заулэ афишIыгъ. Ащ зыкъызэрыфагъэзэгъэ Iофыгъо пэпчъкIэ пшъэрылъхэр афишIыгъэх, ахэр загъэцэкIэн фэе пIалъэхэр ыгъэнэфагъэх.

Адыгэ Республикэм и ЛIышъхьэ ипресс-къулыкъу