Адыгэ Республикэм и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат видеозэпхыныгъэм иамалкIэ партием ирайон отделениехэм ахэтхэм зэдэгущыIэгъу адыриIагъ.

Социальнэу мыухъумэгъэ цIыфхэм ыкIи медицинэм иIофышIэхэм IэпыIэгъу афэхъу­гъэным единороссхэр тапэкIэ зэрэхэлэжьэщтхэр ары Iофыгъо шъхьаIэу къаIэтыгъэр. Коронавирусым ылъэныкъокIэ Iофхэм язытет непэ къызэрыкIоу зэрэщымытыр Адыгеим и ЛIышъхьэ къыхигъэщыгъ. Ащ къыхэкIыкIэ медикхэм, псауныгъэр къэухъумэгъэным исистемэ зэрэпсаоу Iофышхо агъэцакIэ.

— КIуачIэу ыкIи амалэу щы­Iэр зэкIэ тэгъэфедэ. Мы Iоф­шIэным волонтерхэр, медицинэм епхыгъэ апшъэрэ еджапIэхэм ыкIи колледжхэм аще­джэрэ студентхэр къыхэтэгъэлажьэх. ЧIыпIэ тедзэхэр тэгъэ­псых, Iэзэгъу уцхэмкIэ упчIэу къэуцухэрэр зэшIотэхых. Шъо­лъыр оперативнэ штабыр зэпыугъо имыIэу мэлажьэ. Ковидыр къызэолIагъэхэм защя­Iа­зэхэрэ медицинэ учреждениехэм зэпхыныгъэ адытиI. Мыщ дэжьым сыд фэдэрэ IэпыIэгъуми мэхьанэшхо иI, ар къыдэтлъытэзэ тиIофшIэн зэхэтэщэ, — къыIуагъ КъумпIыл Мурат.

«Единэ Россием» мы лъэныкъомкIэ IофшIэнышхо зэригъэцакIэрэр зэхэсыгъом щыхагъэунэфыкIыгъ. Партием пшъэ­рылъ къинхэр зэшIуихынхэм зэрэфэхьазырыр щысэхэмкIэ къыгъэлъэгъуагъ.

— Зэпахырэ узым пэшIуе­кIогъэным фэшI мы мэзэ къинхэм партийцэхэм Iофышхо агъэцэкIагъ. Депутатхэм якъулыкъушIэ ыкIи унэе машинэхэр медикхэм аратыщтыгъэх. Джащ фэдэу сатыушIыпIэ гупчэу «Магнитым» игъусэхэу медицинэм иIофышIэхэм апае гъомылэпхъэ Iалъмэкъхэр агъэхьазырыгъэх, — къыхигъэщыгъ республикэм ипащэ.

Мы пстэуми мэхьанэшхо зэряIэр, ау непэ Iофхэм язытет джыри зэрэхьылъэр Адыгеим и ЛIышъхьэ къыхигъэщызэ, медикхэм атегъэуагъэр нахь макIэ шIыгъэным, зэпахырэ узыр къызэтегъэуцогъэным пстэуми акIуачIэ рахьылIэн фаеу ылъытагъ. Амбулаторнэ сымаджэхэм Iэзэгъу уцхэр ­игъом аIэкIагъэхьанхэм, джащ фэдэу коронавирусыр зиIагъэу зэIэзэгъахэхэм япсауныгъэ изытет лъыплъэгъэныр пшъэ­рылъ шъхьаIэу къыгъэнэфагъ.

— ГумэкIыгъо зиIэ цIыфхэм тишIуагъэ ядгъэкIын, тынаIэ атетын фае. Пшъэрылъхэр зэшIохыгъэ зэрэхъурэм елъытыгъ экономикэ ыкIи социальнэ Iофыгъохэр шъолъырым щызэшIохыгъэхэ зэрэхъущтыр. АщкIэ мэхьанэшхо зиIэ къэралыгъо программэхэм ыкIи лъэпкъ проектхэм къадыхэлъытагъэхэр лъыдгъэкIотэнхэ, бюджетым ихахъохэр нахьыбэ тшIынхэ, IофшIэпIэ чIыпIэхэр къызэтедгъэнэнхэ фае, — къыIуагъ КъумпIыл Мурат.

АР-м и къэралыгъо Совет — Хасэм щыIэ фракциеу «Единэ Россием» ипащэу Владимир Нарожнэр мы лъэныкъомкIэ депутатхэм Iофэу агъэцакIэрэм къытегущыIагъ.

Зэхэсыгъом унашъо щаштагъ зэпахырэ узэу коронавирусым пэшIуекIогъэным фытегъэпсы­хьэгъэ колл-гупчэхэр партием ичIыпIэ къутамэхэм къащызэIуа­хынхэу.

— ТицIыфхэм IэпыIэгъу ящыкIагъэмэ зы такъикърэ тыкъызэтемыуцоу Iоф тшIэн фае. Мы IофшIэным партийцэхэр къыхэ­лэжьэнхэм мэхьанэшхо иI, — къыIуагъ республикэм ипащэ.

АР-м и ЛIышъхьэ ипресс-къулыкъу