2020-рэ илъэсым шэкIогъум и 16-м къыщегъэ­жьа­гъэу тыгъэгъазэм и 20-м нэс АР-м лъэпкъ IэшIа­гъэхэмкIэ IэпэIасэхэм я Ассоциацие кIэщакIо зы­фэхъугъэ шъо­лъыр зэнэкъокъоу «Лъэпкъ шIыкIэм диштэрэ илъэсыкIэ джэгуалъэхэр» зыфиIорэр зэхащагъ.

Ащ хэлэжьэнхэу къырагъэблэгъа­гъэх республикэм имуниципальнэ гъэсэныгъэ учреждениехэм аще­джэхэрэр, лъэпкъ IэшIагъэм пылъхэр. Ахэм ахэхьэх дышъэ хэдыкIыныр, хъэныр, пхъэм хэбзыкIыныр, гъучIым хэгъэжъыкIыныр ыкIи нэмыкIхэри.

ИлъэсыкIэ джэгуалъэхэу зэнэкъо­къум къырахьылIагъэхэр лъэпкъ шIыкIэм тетэу ыкIи илъэсыкIэ нэшанэр къыраIотыкIэу, щынэгъон­чъэу, илъэсыкIэ чъыгым пыплъэшъу­нэу гъэпсыгъэх. Джэгуалъэм иинагъэкIэ сантиметрэ 15-м ехъурэп.

ИлъэсыкIэ джэголъэ хьазырхэр 2020-рэ илъэсым тыгъэгъазэм и 18-м ыкIи и 19-м пчэдыжьым сы­хьатыр 10-м къыщегъэжьагъэу пчы­хьэм сыхьатыр 6-м нэс Мые­къуапэ иурамэу Краснооктябрьскэм иунэу N 9-м тет салонэу «Дышъэ идагъ» зыфиIорэм къырахьылIэнхэ фэягъ.

Тыгъэгъазэм и 20-м къыщыу­благъэу и 25-м нэс IэшIагъэхэм комиссиер ахэплъэщт, лъэпкъ нэ­ша­нэхэр къизыIотыкIыхэрэ анахь да­хэу, гъэшIэгъонэу шIыгъэ IофшIэгъи 10 къыхихыщт.

ЗэкIэ зэнэкъокъум хэлажьэхэрэм дипломхэр аратыщтых. Шъолъыр зэнэкъокъоу «Лъэпкъ шIыкIэм ди­штэрэ илъэсыкIэ джэгуалъэхэр» зыфиIорэм текIоныгъэ къыщыдэзыхыгъэ ныбжьыкIэхэм Ассоциацием идипломхэр ыкIи ишIухьафтынхэр аратыщтых.

КIарэ Фатим.