БлэкIыгъэ бэрэскэшхо мафэм, хъутбэм те­фэу, Мыекъуапэ имэщыт шъхьаIэ ипчъэхэр къызэIуихыжьыгъ.

Адыгэ Республикэм ыкIи Пшызэ шъолъыр ябыслъымэнхэм ядингъэIорышIапIэ ипащэу, муфтиеу Къэрдэнэ Аскэрбый къызэриIуагъэмкIэ, нэчыхьэхэр зыщатхэу, дингъэIорышIапIэм и Совет изэхэсыгъохэр зыщыкIорэ унэу хэтым гъэцэкIэжьынхэр нэсыгъэх. Мэщытым иапэрэ къат иджэхашъо къэфабэу шIыгъэныр пшъэрылъ шъхьаIэу зы­фагъэуцужьыгъэ къодыеу, Iоф­шIэнхэр зырагъажьэм, мэщыт унэ лъакъом щегъэжьагъэу унашъхьэм нэсэу, ыкIоцIыхэри зэтегъэпсыхьагъэу агъэцэкIэ­жьыгъэх. ТхьакIыпIэхэр кафелькIэ агъэпкIэжьыгъэх, псыкъэ­кIуапIэр агъэцэкIэжьыгъ, кIа­шъом нэсэу тыди зэпэлыдыжьы. УнашъхьэмкIи гумэкIыгъоу щыIагъэхэр дагъэзыжьыгъэх. Имамэу Шъхьэлэхъо Ибрахьимэ къызэIуахыжьыгъэ мэщытым апэрэ хъутбэу щыкIуагъэр зэри­щагъ. Быслъымэнэу къэзэрэугъоигъэхэм эпидемиологическэ шапхъэхэр агъэцэкIэнхэу, благъэу зэкIэрэмытIысхьанхэу уна­шъо къафишIыгъ. «ЦIыф бэдэдэ къемыкIолIэным фэшIыкIэ, бэ­рэскэшхо хъутбэр зэрэщыIэщтымкIэ быслъымэнхэм макъэ ядгъэIугъэп. Рес­публикэм и ЛIышъхьэу КъумпIыл Мурат лъэшэу ынаIэ къыттетыгъ. Зимылъку хэзылъхьагъэ­хэм, зи­кIуачIэкIэ Iоф щызышIагъэхэм Тхьэм ипсапэ аIуегъэ­кIэжь», — хигъэунэфыкIыгъ муфтиеу Къэрдэнэ Аскэрбый.

Ау щытми, зэхэзыхыгъэхэм ащыщхэр, Шъхьэлэхъо Владимир фэдэу, ТIуапсэ нэс къикIыгъэх. Ащ къызэриIуагъэмкIэ, Тхьагъа­пшъэ фэдэу, хы ШIуцIэ Iушъо шапсыгъэ чылэгъо зытIущ ныIэп мэщытхэр зыдэтхэр. Арышъ, апэрэ бэрэскэшхо хъутбэу гъэ­цэкIэжьынхэм ауж Мыекъопэ мэщыт шъхьаIэм щыкIуагъэр благъэкIын алъэкIыгъэп.

«Адыгэ РеспубликэмкIи, Пшызэ шъолъырымкIи гуIэтыпIэу тиIэр мы мэщыт шъхьаIэр ары. Ащ ипчъэхэр къызэIуихыжьы­гъэу, тыкъэмыкIон тлъэкIына. Электропоездэу «Ласточка» зыфиIорэмкIэ пчэдыжь сыкъэ­кIуагъ, мэфэ заулэрэ сыщы­Iэщт», — Шъхьэлэхъо Владимир игухэлъхэмкIэ къыддэгощагъ.

Мэщытыр зычIэт унэр джы дэгъоу къагъэфабэ зэрэхъугъэм ар нахь гуIэтыпIэ къышIыгъ. Апэрэ къатым иджэхашъохэр мэфабэх, квадратнэ метрэ миным фэдизым алырэгъоу те-лъыр зэблахъугъ. Хъутбэми, нэ­мазми къекIуалIэхэрэмкIэ ар джы гупсэф.

Непэрэ уахътэм ишапхъэмэ адиштэу мэщытым чIэхьэпIэ шъхьаIэу иIэхэм ямызакъоу, ыбгъукIэ щыIэхэри къыщызэIуа­хыжьыгъ. Бгъагъэу яIэхэм апч­хэр хагъэуцожьи, чIэхьэпIэ унэ цIыкIухэр, верандэхэм афэдэу, агъэпсыгъэх, цокъэгъэтIылъыпIэ мэкIаехэр дэпкъхэмкIэ ре­кIокIэу агъэуцугъэх. ЧIэхьагъум ыкIи чIэкIыжьыгъом цIыфхэр щызэримыхьылIэнхэу пстэури фэIорышIэ.

БлэкIыгъэ бэрэскэшхо хъутбэм щыублагъэу Адыгэ Респуб­ликэм ыкIи Пшызэ шъолъыр ябыслъымэнхэм ямэщыт шъхьа­Iэ гъэкIэжьыгъэу ипчъэхэр къы­зэIуихыжьыгъ. БыслъымэнхэмкIэ илъэсэу икIырэм ихъугъэ-­шIэгъэ шъхьаIэу ар хъугъэ.

Тэу Замир.