ЗыщызэIукIэрэм икъэбар

IофшIэпIэ чIыпIэхэр къэзытыхэрэм страхованиемкIэ взносэу къа­ты­рэм­кIэ ыкIи къэралыгъом иIахь къы­­хилъхьаным фытегъэпсыхьэгъэ программэм хэлажьэхэрэм явзнос­хэмкIэ шIокI зимыIэ пенсионнэ страхованиемкIэ УФ-м исистемэ пен­сиер щыгъэпсыгъэ мэхъу.

ЦIыфым ипенсие зыщызэIукIэрэм щыугъоигъэ хъурэр УФ-м ПенсиехэмкIэ ифонд цыхьэ фишIыгъэу, ащ ыгъэIорышIэнэу къыфигъэнэн ылъэкIыщт, мыкъэра­лыгъо пенсионнэ фонд горэм фигъэкIонэуи амал щыI. Уахътэм къызэригъэлъэгъуагъэмкIэ, пенсиер зыщызэIукIэрэм икъэбар лъыплъэу щыIэр макIэ. Къэралыгъо фэIо-фашIэхэм япортал е ПенсиехэмкIэ фондым щыбгъэпсыгъэ «унэе кабинетым» уихьэмэ зэбгъэшIэн плъэкIыщт. Ежь фондым икъулыкъоу цIыфхэм Iоф адэзышIэрэм зыфэбгъазэми къыуаIощт.

УФ-м ПенсиехэмкIэ ифонд цыхьэ фишIи ащ ыгъэ­IорышIэнэу къыфэзгъэнагъэм пенсиеу зэIукIагъэр зыфэдизыр, къыхахъорэр, нэмыкI къэбарэу пылъыр «унэе кабинетым» ригъотэщтых, ау мыкъэралыгъо фондхэм ащыщ езытыгъэм ащ ыцIэ ныIэп рилъэгъощтыр.

Пенсиеу зэIукIэрэр илъэс къэс зы фондым Iыпхынышъ, адрэм бгъэкIон уфит, ау къыдэплъытэн фаер, илъэситфым зэ гъогогъурэ нахьыбэ зэблэпхъумэ, уиинвестиционнэ хахъохэр чIэунэнхэм ищынагъо зэрэщыIэр ары. ЦIыфым ащ фэдэ чIэнагъэ ышIымэ шIокI имыIэу ар лъыгъэIэсыгъэным фэгъэхьыгъэ унашъом 2019-рэ илъэсым къыщегъэжьагъэу кIуачIэ иIэ хъугъэ.

Уиахъщэ зыIыгъ фондыр зэблэпхъуным пае лъэIу тхылъыр тыгъэгъэзэ мазэм и 1-м шIомыкIэу птын фае. Ащ ыуж етIани уегупшысэнэу и 31-м нэс пIалъэ къыуаты.

МэфэкIым пенсиехэр къызэратыщтхэр

ИлъэсыкIэу къихьэрэм имэфэкI ма­фэхэм пенсиехэр цIыфхэм зэраIа­кIагъэхьащтхэм играфик УФ-м Пен­сиехэмкIэ ифонд и Къутамэу АР-м щыIэм зэхигъэуцуагъ.

Ащ къызэрэщыдэлъытагъэмкIэ, щылэ мазэм и 3 — 4-м почтэм къызэритын фэягъэхэм тыгъэгъазэм и 29-м шIомыкIэу ахъщэ тынхэр къаIакIагъэхьащтых.

Щылэ мазэм и 5 — 6-м къызфахьын фаехэм и 5-м, и 7-м къызэраты хабзэхэм и 6-м къаIэкIэхьащт. Щылэ мазэм и 8 — 9-м къызIэкIахьэ хабзэхэм и 8-м, и 10 — 11-м къызфахьыхэрэм — и 9-м къаратыщт.

Почтэм нэмыкIэуи пенсиехэр цIыфхэм аIэкIэгъэ­хьэгъэнхэмкIэ Гупчэ щыI. Ащ щылэ мазэм и 3 — 4-м зэритын фаехэм и 3-м, мазэм и 5-м, и 6-м е и 7-м зыIэкIагъахьэ хабзэхэм и 5-м, и 8 — 9-м къызэратыхэрэм и 8-м, щылэ мазэм и 10-м е и 11-м къызфахьын фаехэм и 11-м къаIэкIэхьащт.

Щылэ мазэм и 12-м къыщегъэжьагъэу нахьыпэкIэ агъэнэфэгъэ графикым тетэу мы организациехэм цIыфхэм пенсиехэр аIэкIэхьащтых.

Банкым икартэ зыгъэфедэу, 2021-рэ илъэсым иапэрэ мэфипшI тефэу ащкIэ зипенсие къызфэкIон фаехэм, мы мазэр имыкIызэ счетым къафихьащт.

Джащ фэдэу IофшIапIэ Iумытыжь пенсионерэу страхованиемкIэ пенсие къызэратыхэрэм проценти 6,3-рэ къафыхэхъуагъэу щылэ мазэм и 1-м къыщыублагъэу къафэкIощт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу