«Кружковое движения НТИ.Junior» зыфиIорэ Олимпиадэм иаужы­рэ уцугъо Къыблэ федеральнэ шъолъырым щыкIуагъ. Мыщ пре­зи­дент платформэу «Россия — страна возможностей» игъусэу Iоф­тхьабзэм кIэщакIо фэхъугъэх.

Я 5 — 7-рэ классхэм аще­джэрэ кIэлэеджэкIо 80 онлайн шIыкIэм тетэу мэфэ реным зэнэкъокъугъэх.

— Сэнэхьатэу къыхэшъухыщтым фэгъэзагъэу зы лъэбэкъу цIыкIу шъушIыгъэ. Ау ар егъэ­жьапIэ зэрэхъущтым сицыхьэ телъ. ТапэкIэ инженер, шIэ­ныгъэлэжь, ушэтэкIо IэпэIасэ шъухъунымкIэ ар IэубытыпIэ фэхъущт, — финалым ихьэгъэ кIэлэеджакIохэм закъыфигъэ­загъ «Россия — страна возможностей» зыфиIорэ платформэм игенеральнэ пащэу Алексей Комиссаровым.

Лъэпкъ проектэу «Гъэсэныгъэм» къыдыхэлъытэгъэ федеральнэ проектэу «Социальные лифты для каждого» зыфиIорэм хэтэу Iофтхьабзэр зэхащагъ. Къэралыгъом ишъолъыр 83-мэ ащыпсэурэ кIэлэеджэкIо 28732-мэ олимпиадэм хэлэжьэнхэу тхьапэхэр къагъэхьыгъэх. Ахэм ащыщэу 1600-м ехъур финалым ихьагъэх. Зэфэхьысыжьхэр ты­гъэгъазэм и 20-м нэс ашIыщтых.

Аужырэ уцугъом лъэныкъуитфыкIэ кIэлэеджакIохэм заушэтыгъ. Виртуальнэ дунаим, космосым, роботхэм ядунае, цIыфым ыкIи тыкъэзыуцухьэрэ ду­наим япхыгъэ технологиехэм алъэныкъокIэ ныбжьыкIэхэм гъэцэкIэнхэр ашIыгъэх. Къыхэгъэщыгъэн фае IофшIэнхэр зэкIэ Iудзыгъэ шIыкIэм тетэу кIэлэеджакIохэм зэрашIыгъэхэр. Унэм исхэу пстэури зэшIуа­хыгъ, видеозэпхыныгъэкIэ купхэр зэ­рэлъэгъущтыгъэх ыкIи гущыIэгъу зэфэхъущтыгъэх.

Финалым ихьагъэхэм Адыгэ Рес­публикэм иныбжьыкIэхэр ахэфагъэх. «Антарктические птицы» зыфиIорэ купым роботхэм ядунае фэгъэхьыгъэу къыгъэхьазырыгъэмкIэ текIоныгъэ къыфагъэшъошагъ. Ащ Мые­къуапэ щыщ кIэлэеджакIоу Алексей Демченкэр хэт. Тыкъэ­зыуцухьэрэ дунаим фэгъэхьыгъэ технологием ылъэныкъокIэ «The Carrot» зыфиIорэ купыр къыхагъэщыгъ. Къуаджэу Хьа­лъэкъуае щыщ ЛIыхэсэ Залинэ ащ хэт.

ТекIоныгъэ къэзыхьыгъэхэм дипломхэмрэ апэкIэ къашъхьэпэщт шIухьафтынхэмрэ къаратыщтых.

Абрэдж Сэтэнай.