Адыгэ Республикэм и ЛIышъхьэу КъумпIыл Мурат зэпахырэ узэу коронавирусым пэ­шIуекIогъэным фытегъэпсыхьэгъэ шъо­лъыр колл-гупчэм иIофшIэн нахьышIоу зэхэ­щэ­гъэ­нымкIэ оперативнэ зэхэсыгъо зэхищагъ.

Республикэм ипащэ пэублэм къызэрэщиIуагъэмкIэ, колл-гупчэм зыкъыфэзыгъазэхэрэм япчъагъэ мы аужырэ мафэхэм хэпшIыкIэу хэхъуагъ. Социальнэ хъытыухэм къарыхьэхэрэм язэ­фэхьысыжьхэм къызэригъэ­лъагъоу, коронавирусым епхыгъэ Iофыгъоу къаIэтыхэрэмкIэ цIыфхэм зэпхыныгъэу адыряIэр джыри нахь гъэлъэшыгъэн фае. Закъыфэзыгъазэхэрэм ягумэкIыгъохэр зэхэфыгъэнхэм фэшI IофшIэныр зэрифэшъуашэу зэ­хэщэгъэн зэрэфаер АР-м и ЛIышъхьэ хигъэунэфыкIыгъ.

Республикэм ивице-премь­е­рэу Наталья Широковам къызэрэхигъэщыгъэмкIэ, шэкIогъум и 27-м щыублагъэу зэикI фе­деральнэ линиеу «122-м» иIоф­шIэн шъолъырым щыригъэжьагъ, ащ къыдыхэлъытагъэу операторхэм апае чIыпIэ 20 агъэ­псыгъ. Адыге­им и ЛIышъхьэ ипшъэрылъкIэ тыгъуасэ щегъэ­жьагъэу операторхэм апае джыри чIыпIэ тедзи 9, медперсоналым — чIыпIи 4 къафызэ­Iуахыгъ.

Мы IофшIэным сыдэу щытми укъекIолIэныр зэрэмытэрэзыр республикэм ипащэ къыхигъэщыгъ, цIыфхэм игъом упчIэжьэгъу афэхъунхэм ыкIи медицинэ IэпыIэгъу арагъэгъотыным фэшI колл-гупчэм кIуачIэу IэкIэ­лъым тапэкIи хэгъэхъогъэн фаеу ылъытагъ.

КъумпIыл Мурат пшъэрылъ къыгъэуцугъ студентхэм ащыщ волонтерхэм яегъэджэн зэхащэнэу, ищыкIэгъэ оборудованиемкIэ, зэпхыныгъэм иамалхэмкIэ колл-гупчэр зэтырагъэпсы­хьанэу. Мы IофшIэным социальнэ пшъэдэкIыжь зыхьырэ бизнесыр, общественнэ организациехэр, политикэ партиехэр къыхэгъэлэжьэгъэнхэм мэхьа­нэшхо иIэу къыIуагъ. ГущыIэм пае, партиеу «Единэ Россием» ишъолъыр къутамэ хэтхэм къау­гъоигъэ ахъщэмкIэ колл-гупчэм Iоф щызышIэрэ волонтерхэр агъашхэх.

ЭпидемиологиемкIэ Iофхэм язытет елъытыгъэу шъолъырым зэшIуихын фаеу ыпашъхьэ къиуцорэр зэрэбэр, ащ фэгъэзагъэхэм лъэныкъо пстэуми акIуачIэ рахьылIэн зэрэфаер республикэм ипащэ къыIуагъ. Госпитальхэм IэпэчIэгъэнэ чIы­пIэхэр ащагъэпсых, медицинэ оборудованиер къащэфы, медицинэм иIофышIэхэр ра­гъаджэх.

АР-м и ЛIышъхьэ ипресс-къулыкъу