Тыгъэгъазэм и 22-р — энергетикым и Маф
Энергетическэ отраслэм иIофышIэхэу, иветеранхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIым — энергетикым и Мафэ фэшI тышъуфэгушIо!
Энергетикэр непэ Урысыем иэкономикэ иотраслэ шъхьаIэхэм зэу ащыщ, шъолъырхэм яэкономикэ щынэгъончъагъэкIэ, ахэм хэхъоныгъэ ашIынымкIэ лъапсэу щыт. Энергетическэ системэ дэгъу зиIэ псэупIэр ары непэ псынкIэу социальнэ-экономикэ хэхъоныгъэ зышIын зылъэкIыщтыр.
Энергетикэр экономикэм ихэхъоныгъэ къэзгъэнэфэрэ, Адыгеим исхэм ящыIэкIэ-псэукIэ нахьышIу шIыгъэнымкIэ, тиреспубликэ инвестициехэмкIэ нахь хъопсагъоу щытынымкIэ лъапсэу щыт.
Адыгеим иэнергетикхэм шIэныгъэу ыкIи опытэу аIэкIэлъыр пшъэрылъ къинхэр агъэцэкIэнхэм, республикэм ыкIи къэралыгъом зэрэпсаоу экономикэ ыкIи социальнэ хэхъоныгъэ ашIынымкIэ амалхэр щыIэнхэм зэрэфагъэIорышIэщтым тицыхьэ телъ.
Ныбджэгъу лъапIэхэр, псауныгъэ, щыIэкIэ-псэукIэ дэгъу шъуиIэнэу, шъуиIофшIэн гъэхъэгъакIэхэр щышъушIынхэу шъуфэтэIо.
Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет —Хасэм и Тхьаматэу Владимир Нарожный